Dezenhu Konstrusaun Resort Pelican Paradise iha Tasi-Tolu. Foto Espesial

DILI, (TATOLI) – Ekipa husi Pelican Paradise Holdings Timor-Leste hasoru Primeiru-Ministru, Taur Matan Ruak, hodi relata servisu projetu no dezenvolvimentu ne’ebé kompañia ne’e sei halo.

“Ida ne’e hanesan reuniaun importante ho Primeiru-Ministru no nia suporta ami nia projetu no dezenvolvimentu, nune’e nia sei servisu ho ninia ekipa sira hodi garante katak projetu ne’e sei realiza iha tempu badak”, katak Diretór Pelican Paradise, Ravi Kathiravelu, ba jornalista sira hafoin hasoru PM iha Palásiu Governu, ohin.

Entretantu Pelican Paradise hahú negosiasaun ho Governu desde 2015, nune’e governu hasai ona rezolusaun governu nú 33/2015 5 outubru no aprova Tasitolu hodi hahú konstrusaun.

Kompañia estranjeira ne’e sei investe milliaun $310 hodi halo otél luxu fitun lima ho kuartu 464, restaurante, apartementu, golf, departementu ho kualidade aas, sentru komunidade, igreja, muzeum no seluk tan.

Kontratu Pelican Paradise ho governu iha inisiál ba tinan 50, posibilidade renova ba tinan 50. Sei sai kompañia inan (Mother Company) ba kompañia 20 husi nasaun Singapura no Malázia ne’ebé sei hamutuk halo projetu boot ne’ebé sei okupa terrenu ektare 564.

Tuir informasaun, planu Pelican Paradise ba faze dahuluk atu fó empregu ba timoroan kuaze 1000 no iha faze konstrusaun mós posibilidade iha kampu servisu ba timoroan.

Agora dadaun, kompañia orijen Singapura ne’e iha ona ninia sede iha Timor-Plaza no hala’o ona atividade balun ne’ebé integra mós timoroan.

Iha loron 22 janeiru 2018, VII Governu konstitusionál atribui ona sertifikadu investimentu ba kompañia internasionál husi Malázia, Pelican Paradise hodi halo investimentu turístiku Tasitolu.

Sertifikadu investimentu ne’e entrega direta husi xefe governu konstitusionál da-hitu, Marí Alkatiri, ba CEO (Chief Executive Officer) Pelican Paradise, Datuk Edwar Ong, asiste mós husi Ministru Turizmu, Manuel Florêncio Vong, inklui membru governu balun, emprezáriu nasionál no internasionál nomós parseiru dezenvolvimentu sira.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here