Nee mak aktividades trabailadores sira servisu no halo hela konstrusaun ba fonte Komoro 3 iha area Fomento Komoro Dili 17 Maiu 2017.Foto TATOLI/Antonio Goncalves

DILI (TATOLI) – Ministru Obras Públikas, Salvador Soares dos Reis Pires foin lais ne’e hala’o enkontru ho embaixadór Japaun iha Timor-Leste, Hiroshi Miami hodi partilla informasaun konaba serimónia entrega no inaugurasaun Ponte Comoro III ba Governu Timor-Leste, liuhosi Ministériu Obras Públika (MOP) tanba  konstrusaun ne’e remata ona.

Tuir informasaun ne’ebé Ajénsia Tatoli asesu liuhosi servisu obras públika, serimónia entrega no inaugurasaun ne’e sei hala’o iha fim Setembru tinan ne’e, no provizóriamente bele loke ona ba públiku hodi utiliza ba movimentasaun transporte no komunidade, maibé bainhira besik loron inaugurasaun, provizóriamente sei taka ba públiku durante loron 5 hodi halo preparasaun ba serimónia ofisiál inaugurasaun.

Entretantu Prosesu konstrusaun Ponte Comoro III iha loron 4 Juñu 2016 no simbólikamente kontrasaun ne’e lansa iha loron 17 Outubru 2016, ne’ebé tuir planu remata iha loron 31 Agostu 2018.

Konstrusaun Ponte Comoro III, responsavel hosi konstrusaun ne’e mak empreza Tobishima Corporation no konsórsiu konsultór sira mak hanesan Ingerosec Corporation, Nipon Engineering Consultant Co. Ltd no IDEAS, Inc, ho kustu ba konstrusaun hamutuk ¥ 1.690.000.000,00 (Yen Japaun) ou hanesan US$ 16.171.610,00.

Konstrusaun ne’e realiza tanba kooperasaun entre Governu Timor-Leste no Governu Japaun, ne’ebé fó tulun liuhosi Ajénsia Japaun nian ba Kooperasaun Internasionál (JICA).

Nu’udar obra Grant Aid ne’ebé finansia husi Governu Japaun, liu husi Japan International JICA. Governu Timor Leste rasik, aloka orsamentu nu’udar fundu kontra partida  hamutuk millaun US$ 3.

Ponte ne’e hanesan ponte foun ne’ebé liga ba estrada Delta ba Rai-hun, Comoro, no sei sai hanesan dalan alternativa hodi prevene problema engarrafamentu, promove atividade ekonómiku no kontribui ba dezenvolvimentu iha kapitál Dili.

Ponte ne’e rasik ho nia tipus Girder Box , ho naruk 249 metros, nia luan 11,55 metros, kompletu ho paseiu husi norte mota ain ho 2 metros, no parte súl mota ulun ho 0,75 metros.

Períodu konstrusaun hamutuk tinan 2 no obra ida ne’e fó servisu ba ema hamutuk 88, ne’ebé kompostu husi ema estranjeiru na’in 37 no timoroan hamutuk 51

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here