Prezidente Parlamentu Nasionál (PPN), Arão Noé de Jesus. Imajen/Xisto Freitas

DILI (TATOLI)—Prezidente Parlamentu Nasionál, Arão Noé de Jesus, hateten orsamentu jerál Estadu (OJE) ho montante biliaun $1,2 ne’e atu selu tusan governu nian ne’ebé to’o agora seidauk selu hotu.

Governu la kria projetu foun iha tinan ida ne’e, tanba ne’e sei la iha problema ho ezekusaun ba orsamentu refere.

“Osan ne’e la’ós atu kria projetu foun, maibé atu selu kustu sira ne’ebé gasta tiha ona hahú hosi 1 janeiru-jullu tinan ne’e inklui selu tusan hosi projetu sira ne’ebé durante ne’e governu anteriór-sira asina hela ne’ebé laiha orsamentu atu selu,” Arão hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, semana ne’e, hafoin hala’o enkontru ho Prezidente Repúblika, Francisco Guterres Lú Olo, kona-ba OJE 2018 no funsionamentu Parlamentu nian.

PPN hatutan OJE 2018 mai ho karater urjénsia, nune’e sei hamenus audiénsia nia tempu, hamenus debate iha jeneralidade no espesialidade, nune’e Governu bele iha tempu atu prepara fali proposta OJE ba tinan 2019 nian.

Nesesáriu mós OJE 2018 nu’udar alternativa salva kompañia sira ne’ebé mak ameasadu taka.

“Kompañia lubuk maka mai hasoru ona Prezidente Repúblika katak kompañia sira ne’e ameasadu taka tanba osan laiha,” Arão Noé konta tuir.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here