Madalena Hanjam. Foto espesiál

DILI, (TATOLI) – Eis Vise Ministra Saúde, Madalena Hanjam, eleitu ba Prezidente Cruz Vermelha Timor-Leste(CVTL), ba períodu 2018 to’o 2022.

Eis Governante ne’e eleitu, tanba hili hosi delegadu munisipál 13 durante asembleia jerál CVTL ba 2018 ne’ebé hala’o iha salaun São Paulo II Komoro, ohin.

Prezidente CVTL sesante, José Pereira da Conceição, hateten asembleia nasionál durante loron rua, horisehik no ohin ne’e hili mós Vise Prezidente, Sekretáriu Nasionál, Membru Konsellu Diretivu Nasionál, Prezidente Finansa no Prezidente Rejionál I to’o IV.

Rejiaun I  kobre munisípiu  Baukau, Vikeke no Lospalos, Rejionál II  mak Dili, Manatutu ho Ambenu-Oekusi, Rejiaun III, Same, Ainaru, Aileu, Kovalima, Same no Manufahi, Rejiaun IV maka Bobonaru, Likisa no Ermera.

Prezidente sesante ne’e hateten asume kargu iha organizasaun ne’e ho voluntariamente, tanba la hetan saláriu.

“Prezidente Cruz Vermelha ne’e voluntariamente servisu no la simu osan, maibé iha de’it kondisaun kiik balun ne’ebé fó hodi fasilita servisuʺ, katak nia ba jornalista sira.

Organizasaun  CVTL harii iha Timor-Leste, 2000 hodi atende nesesidade ema vulnerével sira no tulun emerjénsia sira.

ʺAmi nia misaun maka oinsá redus ema sira ne’ebé sofre, hakman sira nia susar no terus iha tempu pás no konflituʺ, tenik tan.

Durante ne’e fó formasaun ba foinsa’e sira no komunidade kona-ba prevensaun risku dezastre, treinamentu primeiru sukoru, kanalizasaun bee mós ba komunidade iha área rurais.

Jornalista: Agapito dos Santos

Editora: Rita Almeida

1 KOMENTÁRIU

  1. husu nafatin ba parte Treinamentu sira konaba Primeiro sokorru, Joven saudavel, Dezastre manezament nst.. at kontinua sira nia ba Joventude no komunidade no mos tenki tau prioritario liu ba programa Primeiro Sokorru.

HAKEREK NO HATÁN

Please enter your comment!
Please enter your name here