Chief Executive Officer Telkomcel, Yogy Riskian Bahar, entrega lixeira ba Diretór Jerál Turizmu, José Filipe Dias Quintas. Foto/MTKI.

DILI, (TATOLI) – Operadór Telekomunikasaun TELKOMCEL ne’ebé hola parte hanesan parseiru dezenvolvimentu iha Timor-Leste apoia lixeira hamutuk 18 ba sítiu turístiku Na’i-Feto Ramelau hanesan sentimentu responsabilidade atu tau-matan ba ambiente iha país ne’e.

Diretór Ezekutivu Telkomcel, Yogy Riskian Bahar, hatete lixeiru hirak ne’e modifika husi bidon kombustivel ne’ebé Telkomcel uza durante ne’e hodi halo manutensaun ba ekipamentu serbisu nian. Husi asaun uzadu hirak ne’e Telkomcel halo resiklajen atubele uza fali hodi fó benefísiu ba komunidade.

“Tinan barak nia laran, Ramelau atrai ema barak husi rai-laran no li’ur hodi vizita ou halo peregrinasaun no hasa’e devosaun ba Na’i-Feto. Aleinde simu vizitante, presiza mós tau-matan ba ambiente ne’ebé mós iha área refere. Ida ne’e sai hanesan responsabilidade ita hotu nian, husi parte autoridade, vizitante no komunidade tomak”, Yogy hatete iha Sentru Konvensaun Dili, ohin.

Yogi hatutan Telkomcel ne’ebé serbisu hamutuk ho Ministériu Turizmu, Komérsiu no Indústria  (MTKI) konvida sidadaun hotu, liuliu vizitante Ramelau atu labele soe fo’er arbiru iha área ne’e, maibé iha fatin lixu ne’ebé prepara ona.

Yogy afirma Telkomcel kontinua apoia másima no lixu fatin ne’ebé fó ne’e bele kontribui hodi kuidadu ambiente, liuliu sustentabilidade ba rendimentu internu abitante lokál.

Diretór Jerál Turizmu, José Filipe Dias Quintas, hatete apoia ne’ebé fó husi Telkomcel ne’e kontribui iha dezenvolvimentu setór turizmu nian.

“Ida ne’e hanesan inisiativa di’ak ida para apoia ba dezenvolvimentu turizmu, ne’ebé sira mós hola parte, tanba ko’alia kona-ba turizmu parseiru dezenvolvimentu importante tebes, maibé ne’e hanesan parte ida husi parseiru dezenvolvimentu oinsá mak kontribui ba ita-nia setór turizmu nian”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here