Primeiru-Ministru, Taur Matan Ruak. Foto Xisto Freitas

DILI, (TATOLI) – Primeiru-Ministru (PM), Taur Matan Ruak, konsidera Governu Da-Ualu Konstitusionál nia estabilidade governativa la ameasadu.

“Laiha ameasa. Ita-boot sira (jornalista) haree programa Governu pasa ona, orsamentu duo-désimu ba jullu no agustu pasa, tan ne’e agora ita iha osan.  Agora ita atu avansa fali ba orsamentu jerál Estadu (OJE) 2018 nian no tempu badak sei avansa tan ba OJE 2019. Purtantu, governu halo ezersísiu ida maka’as atu asegura ita-nia mákina Estadu la’o nafatin”, PM hato’o ba jornalista sira iha Palásiu Prezidente Nicolau Lobato, Bairru Pité, kinta ne’e, relasiona ho estrutura Governu ne’ebé seidauk kompletu.

Nia esplika kandidatu membru Governu na’in tolu hanesan Alfredo Pires, Rogério de Araújo Mendonça no Samuel Marçal adia simu tomada pose, tanba solidariedade ba malu.

“Sira mantein sira nia solidariedade ba sira seluk ne’ebé seidauk toma pose. Tanba ne’e, sira la toma pose ohin (16/9). Ha’u kontinua ko’alia ho Prezidente Repúblika atu buka solusaun. Restante ne’e ita hein saida maka atu akontese”, katak tan.

Adiamentu ba tomada pose ne’e, Xefe Governu tenik pedidu hosi kandidatu sira no hatutan katak nia sei la eskolla ema seluk atu troka kandidatu na’in sia, tanba governu ida ne’e sustenta hosi Aliansa Maioria Parlamentár (AMP) ne’ebé kompostu hosi partidu CNRT, PLP, KHUNTO, UDT no Frente-Mudansa.

“Ha’u sei la halo ida ne’e (troka na’in sia ho ema seluk), tanba partidu sira ne’e, iha kandidatu mai Governu”, Taur afirma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here