Ministra Solidariedade Sosiál no Inkluzaun, Armanda Berta

DILI (TATOLI) – Ministra Solidariedade Sosiál no Inkluzaun, Armanda Berta halo aprezentasaun iha audiénsia públika ho komisaun iha Parlamentu Nasionál (PN) konaba orsamentu ba ministériu ne’ebé nia lidera ho montante US$ 52.232.470, ne’ebé kobre husi Orsamentu Jerál Estadu (OJE) 2018.

Iha apresiasaun inisiál ba proposta Lei OJE 2018,ho total orsamentu ba Ministériu Solidariedade Sosiál no Inkluzaun (MSSI) ne’ebé mensiona ho konsiderasaun atu kobre tinan tomak 2018 nia, dezde Janeiru to’o Dezembru.

Saláriu no vensimentu hamutuk US$ 1.743.138, atu selu saláriu ba membru governu rua, funsionáriu apontamentu polítiku no funsionáriu permanente hamutuk na’in 423.

Enkuantu bens servisu ho total US$ 2.357.315, hodi asegura funsionamentu MSSI hanesan selu asisténsia téknika, sosa foos, kaixaun, materiál konstrusaun ba vítima dezastre naturál sira, manutensaun veíkulu, kombustivel, materiál fornesimentu, ekipamentu edifísiu, ba banku ne’ebé atende ba benefisiáriu sira, apoiu ba vítima labarik, feto, família veneravel, no servisu operasionál sira.

Nune’e mós ba transferénsia públiku ho total US$ 41.131.487, sei utiliza hodi atende ba pagamentu ba idozu hamutuk na’in 907.656 ho totál orsamentu US$ 35.157.960, pagamentu ba inválidu hamutuk na’in 61.750 ho total orsamentu US$ 8.982.000, ba vítima dezastre naturál sira ho família ho total orsamentu US$ 594.460, pensaun ba sobrevivénsia no invalidés hamutuk 600 ho totál orsamentu US$ 1.368.000, HIV/Sida ho total orsamentu US$ 278.991.

Antes ne’e  Armanda Berta esplika, programa MSSI dezenvolve bazeia ba artigu 56 Konstituisaun RDTL konaba seguransa no tulun sosiál, ne’ebé define konaba seguransa sosiál no asisténsia sosiál, nune’e mós programa rejime kontributivu seguransa sosiál, bazeia ba lei nú 12/2016 14 Novembru, ho objetivu programa ne’e atu proteje traballadór sira ho risku sosiál hodi substitui rendimentu traballadór sira, bainhira sira labele servisu, hamoris atividade ekonomia.

“Programa ne’e nia dezafiu mak atu hare oinsá instituisaun ba rejime kontributivu ba seguransa sosiál hodi bele halo jestaun no funsiona di’ak liután ba programa ne’e,” nia dehan.

Tuir dekretu lei nú 46/2016, kria ona instituisaun nasionál seguransa sosiál, maibé seidauk funsiona tanba enfrenta dezafiu barak ho infraestrutura, rekursu umanu no kapasidade administrational no agora daudauk diresaun nasionál rejime kontributivu seguransa sosiál mak asume jestaun instituisaun nasionál no seguransa sosiál.

Problema seluk husi parte governu mak to’o agora seidauk halo retensaun 4% husi saláriu funsionáriu ne’ebé ko’a 6%, no husi governu rasik mak seguransa sosiál.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here