Ministru Obras Públika, Salvador Soares dos Reis Pires. Imajen Media MOP

DILI, (TATOLI) – Ministru Obras Públikas, Salvador Soares dos Reis Pires, hatete totál proposta orsamentu husi ministériu $100.575.867, maibé  ministériu finansa aprova $100,8.

“Ita halo distribuisaun ba kategoria ho totál orsamentu ne’e, milliaun $5 ba saláriu no vensimentu, milliaun $92 ba bens servisu, $527.000 ba transferénsia públika. Husi totál ne’e ami propoin adisionál $829.248 ba kapitál menor maibé aprovadu de’it $250.000”, dehan membru governu ne’e bainhira halo aprezentasaun iha audiénsia públika ho komisaun E Parlamentu Nasionál ba apresiasaun OJE 2018 iha sala plenária, kinta ne’e.

Nia hatutan kapitál dezenvolvimentu milliaun $3, em termu distribuisaun fahe ba diresaun haat hanesan milliaun $85 aloka ba diresaun jerál eletrisidade, milliaun $6 ba diresaun jerál bee no saneamentu, milliaun $4,5 ba sekretáriu jerál, milliaun $3,6 ba diresaun jerál obras públikas.

Kategoria saláriu vensimentu ho totál orsamentu alokadu milliaun $5, fahe ba item rua hanesan milliaun $4,3 ba saláriu vensimentu, $797.000 ba oras estraordináriu, subsídiu risku, oras deskansa no tempu feriadu.

Kategoria bens servisu alokadu milliaun $92, fahe ba milliaun $52, purvolta pursentu 52 husi totál orsamentu alokadu ba sosa kombustivel jeradór ba sentrál elétrika Hera no Betanu, inklui ona ho dívida no previsaun to’o dezembru 2018.

Orsamentu alokadu ba manutensaun ekipamentu milliaun $25. Manutensaun liña transmisaun elétrika no sub estasaun sira milliaun $10, aloka ba servisu operasionál hodi hala’o manutensaun ba jeradór Hera no Betano, inklui ona dívida milliaun $6,2, ho previzaun to’o dezembru 2018.

Preve mós ba asisténsia téknika milliaun $1,9, viajen lokál $343.000, viajen rai-liur, $17.000, formasaun no semináriu $30.000, instalasaun $235.000, arrendamentu propriedade $109.000, kombustivel servisu operasionál $191.000, manutensaun kareta $311.000, seguru renda no servisu $8.000, materiál no fornesementu eskritóriu $117.000, materiál no fornesimentu operasionál $114.000, servisu tradusaun $5.000, no servisu seluk $508.000.

Nune’e mós kategoria tranfénsia públika, propoin $527.000 hodi selu proposta 27 ne’ebé hala’o husi komunidade hodi monta soleskritóriur painel iha suku sira.

Iha kategoria kapitál menor, propoin orsamentu $429.248, maibé aprova $250.000 hodi sosa kontadór prepagu no transformadór no selu proposta 27 ne’ebé hala’o husi komunidade hodi monta solar painel iha suku sira.

Iha kapitál dezenvolvimentu propoin orsamentu milliaun $3 hodi selu projetu rollover no retensaun iha 2015 no 2016.

Nia informa kona-ba despeza kategoria bens servisu milliaun $74,5, barak liu aloka iha item kombustivel jeradores purvolta milliaun $40,8, item manutensaun ba jeradór liña transmisaun bee no saneamentu nomós manutensaun ba estrada purvolta milliaun $26,8.

Kapitál dezenvolvimentu purvolta milliaun $6,4, ne’ebé atu selu ba projeitu retensaun no rollover tinan 2015 no 2016 hamutuk projetu 86.

Husi númeru ne’e ministériu selu ona 71 projetu ho totál osan milliaun $2,7, no restu husi númeru ne’ebé mak iha ministériu sei aloka nafatin osan duodésimu no tranzitóriu 2018.

Jornalista: Julia Chatrina

Editora: Rita Almeida

HAKEREK NO HATÁN

Please enter your comment!
Please enter your name here