Prezidente Repúblika, Francisco Guterres Lú Olo, entrega bandeira nasionál ba Xefe Misaun TL ba Asian Games, Mateus da Cruz, nu’udar símblu reprezenta nasaun Timor-Leste. Imajen Mídia PR

DILI, (TATOLI) – Atleta nasionál hamutuk 64 hosi modalidade 12, ohin despede Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, antes aranka ba Indonézia hodi partisipa eventu Asian Games.

“Ne’e serimónia despedida simples ida ba ita-nia atleta sira ne’ebé atu partisipa iha Asian Games”, Lú Olo dehan iha serimónia despedida ne’e.

Okaziaun ne’e Xefe Estadu entrega bandeira nasionál ba atleta-sira ho sentidu katak partisipasaun iha jogu internasionál ne’e reprezenta nasaun Timor-Leste.

Atleta sira ne’ebé ohin despede Prezidente Repúblika iha Palásiu Prezidensiál. Foto mídia PR

Ba atelta sira, Prezidente hameno, objetivu importante tuir jogu ne’e la’ós atu buka manán, maibé oinsá foti Timor nia naran no foti povu nia oin iha internasionál.

Iha fatin hanesan, Sekretáriu Estadu Juventude no Desportu, Nélio Isaac  Sarmento, hateten tempu ona Timor-Leste hanesan nasaun independente atu integra misaun iha atividade desportu iha komunidade internasionál, liu-liu kompetisaun hanesan Asian Games.

“Ida ne’e parte ida atu fortifika ita-nia polítika externa, liu-liu ita-nia integrasaun ba komunidade internasionál”, afirma.

Alteta hirak ne’e aranka ona iha meudia ne’e (16/8). Sira ne’ebé aranka uluk ona iha loron 11 fulan ne’e mak modalidade tiru no futeból.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here