Fernanda Borges.

DILI, (TATOLI) – Koordenadora Komisaun Reforma Fiskál, Fernanda Borges, hateten importante atu hadi’a sistema hodi koleta reseita doméstika sira, nune’e bele aumenta rendimentu rai-laran.

“Importante liu ita hadi’a sistema, la’ós de’it kresimentu ekonómiku mak fó ita reseita maibé sistema ne’ebé opta mak bele koleta reseita, koleta di’ak ka ladiak, tuir regra ka la tuir, kapta reseita ka la’e, ida ne’e mak assegura Timor-Leste bele iha aumentu reseita”, tenik nia iha portu, ohin.

Nia dehan kuandu ekonomia boot no buras, osan barak mak sei tama, maibé sei sistema administrasaun aduaneira no autoridade tributária impostu nian seidauk funsiona ho didiak, kresimentu ekonómiku boot to’o ne’ebé mós difísil atu kapta reseita.

Borges hatutan durante ne’e Komisaun Reforma Fiskál servisu di’ak liután ho autoridade aduaneira, autoridade tributária, aportil, no quarentena hodi maksimiza koleta reseita sira.

“Governu halo sistema ho reforma rekursu umanu, reforma lei, reforma prosedimentu, nune’e ita bele iha sistema ida mak integradu no forte atu bele koleta reseita ho efisiénsia”, dehan.

Dehan tan agora dadauk ita iha hela situasaun ne’ebé komérsiu tun, tanba ne’e kresimentu ekonomia mós tun, la konsege kobra no taka kustu ba funsionáriu (saláriu). “Ami servisu maka’as atu haree, pelumenus ita nia kustu operasionál”.

Hodi informa durante ne’e alfándega koleta purvolta milliaun $50 to’o $60, konsidera kiik, espera bele sa’e hodi kobre kustus operasionál sira hanesan saláriu, pensaun ba ferik katuas sira, veteranu sira, nune’e bele reduz hasai osan barak husi fundu petrolíferu.

Antes ne’e Komisaun Reforma Fiskal servisu hamutuk autoridade aduaneira no Banku Nasionál Ultramarinu (BNU) koloka pagamentu elektróniku iha aeroportu no servisu sentrál alfándega nian, nune’e importadór sira bele selu ho kartaun no tama iha kofre Estadu, nune’e fó konfiansa ba importadór, passajeiru no povu tomak katak reseita Estadu tama duni iha kofre.

Nune’e mós sistema Asycuda world ne’ebé implementa ona bele maksimiza reseita nomós reduz kustu ba importadór sira.

“Iha benifísiu ba povu, tanba sei importadór la presiza selu kustu boot, presu sasan mós la sa’e demais”.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here