Reprejentante ADB iha Timor-Leste hasoru Primeiru-Ministru, Taur Matan Ruak, iha Palásiu Governu, ohin. Foto mídia GPM

DILI, (TATOLI) – Reprezentante Banku Dezenvolvimentu Aziátiku (ADB-Asian Development Bank), hasoru malu ho Primeiru-Ministru (PM), Taur Matan Ruak, hodi fahe idéias no informasaun balun, nu’udar parseiru dezenvolvimentu di’ak ba Timor-Leste durante ne’e, liu-liu iha área infraestrutura.

“Enkontru ne’e ami mensiona kona-ba dezafíu bee no saneamentu iha Timor-Leste no ami halo diskusaun oinsá ADB bele suporta programa governu no ami aprezenta idéia balun, oinsá suporta bee no saneamentu hodi lori bee moos atu suporta timoroan sira”, tenik Country Diretór ABD ba Timor-Leste, Paolo Spantigati, ba jornalista sira hafoin hasoru malu ho Xefe Governu iha Palásiu Governu, kuarta (15/8).

Biban ne’e, reprezentante ADB ne’e mós espera Governu da-ualu ne’ebé lidera husi PM Taur Matan Ruak, bele la’o ho di’ak ba oin no nia mós informa oinsá mak ADB bele ajuda dezenvolve Nasaun.

Nia haktuir, xefe Governu fó hanoin importante atu haree didiak dezafíu bainhira harii infraestrutura no dezenvolvimentu sira seluk no husu ADB atu tau atensaun partikularmente ba kualidade no seguransa ba traballadór, no labele difikulta ema bainhira dezenvolve infraestrutura ida.

“Hanesan aman di’ak ida, Primeiru-Ministru fó hanoin ba ADB bainhira ami servisu dezenvolve rai ne’e no ami espera bele halo buat di’ak ho ami nia kompromisu”, dehan.

Entretantu durante ne’e ADB asina ona akordu imprestimu ho Timor-Leste ba dezenvolvimentu  infraestrutura, alende ne’e ADB mós tulun ona konektividade estrada nasionál sira no husi obra sira ne’e konsege kria kampu traballu ba timoroan barak.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here