Ministru Reforma Lejislativa no Asuntu Parlamentár, Fídelis Leite Magalhães. Foto António Goncalves

DILI, (TATOLI) – Ministru Reforma Lejizlativa no Asuntu Parlamentár, Fídelis Leite Magalhães, hateten Primeiru-Ministru, Taur Matan Ruak, sei nafatin mantein komunikasaun ho Prezidente Repúblika, Francisco Guterres Lú Olo, hodi fó pose ba membru governu nain sia ne’ebé pendente.

“Agora ne’e sei hein tomada pose ba membru governu sira hotu, ne’ebé sei pendente hela”, hateten ministru ba jornalista sira iha uma fukun Parlamentu Nasionál, ohin.

Fídelis hatutan: “Prezidente Repúblika ho ita nia Primeiru-Ministru sei kontinua halo komunikasaun no enkontru bebeik para bele hetan solusaun ba ida ne’e, para bele halo tomada pose ba membru governu hotu ne’ebé sei pendente”.

Governante ne’e ho esperansa, Xefe Estadu no Governu sei hetan solusaun ba kestaun ne’e iha tempu badak.

“Buat ida maka ha’u bele dehan ba imi, posizaun Primeiru-Ministru nian katak mantein nafatin ho kandidatu hirak ne’ebé propoin ba Prezidente Repúblika”, tenik tan.

Mesmu, Prezidente Repúblika, Francisco Guterres Lú Olo, konkorda ona  fó pose ba kandidatu membru governu nain tolu hanesan Ministru Planeamentu Investimentu Estratéjiku, Samuel Marçal, Ministru Petróliu no Rekursu Minarai, Alfredo Pires ho Sekretáriu Estadu ba Peska, Rogério Araújo Mendonça.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here