Vise Prezidente Parlamentu Nasionál, Maria Angelina Sarmento. Imajen/Egas Cristovão

DILI, (TATOLI) – Atleta sira ne’ebé atu partisipa eventu Asian Games, ohin despede reprejentante povu iha uma fukun Parlamentu Nasionál (PN).

“Ami nafatin enkoraza sira atu labele haree ba defisiénsia (falta) orsamentál ne’ebé sai obtaklu, maibé tenke kompete ho di’ak, tanba pasadu ita hetan ona prestasaun di’ak iha modalidade lubuk ida hodi hamorin ona Timor-Leste nia naran”, hatete Vise Prezidente PN, Maria Angelina Sarmento, ba jornalista sira hafoin hasoru malu.

Despedida ne’e parte ida atu hetan motivasaun hosi ulun boot reprejentante povu iha uma fukun.

“Prestasaun sira ne’ebé iha ona ita kontinua, hodi hatudu ba mundu katak Timor-Leste mos bele, tanba iha kapasidade ba área desportu hodi kompete ho nasaun sira ne’ebé avansa ona”, tenik tan.

Atleta besik 40 ne’e sei desloka ba Indonézia kinta, (16/8) aban hodi partisipa eventu Asia Games iha loron 18 fulan-agostu no remata iha loron 2 setembru 2018 iha Jakarta no Palembang.

Sekretariu Estadu Juventude no Desportu hamutuk ho Komite Olímpiku Nasionál Timor-Leste maka akompaña atleta sira durante preparasaun.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here