Prezidente Parlamentu Nasionál, Arão Noe. Foto Egas Cristovão

DILI, (TATOLI) – Prezidente Parlamentu Nasionál, Arão Noe, sente problemátiku tanba atu debate Orsamentu Jerál Estadu (OJE) 2018 presiza iha ona Lei Orgánika Governu nian no ministériu sira tenke kompletu ona ho ministru.

“Iha pontu rua mak sai problema ka preokupasaun ba debate Orsamentu Jerál Estadu mak Prezidente Repúblika seidauk promulga Lei Orgánika Governu nian no ladauk fó posse ba kandidatu membru governu sira ne’ebé durante ne’e sei pendente”, lider másimu orgaun lejislativu ba jornalista sira iha Parlamentu Nasionál, Ohin.

Arão Noe akresenta buat rua sai fatór determinante ba prosesu audiénsia ho debate OJE ho karakter urjénsia mak Lei Orgániku Governu no kandidatu membru governu ne’ebé seidauk simu posse, tanba kuandu iha audiénsia mak ministru la hetan prezensa sei implika ba konfirmasaun poder tuir área temátika ida-idak nian.

Nune’e, atu haree área temátika ministériu ida-idak nian sei define liuhosi lei orgánika governu nian, maibé lei ne’e seidauk iha. Nune’e mós kuandu komisaun atu konvida ministru sira atu halo audiénsia, enkuantu ministru seidauk kompletu, ida ne’e mós problema ida, mezmu ministériu balun iha ona Vise Ministru maibé atu konfirma nia poder mak tenke ministru.

Tanba ne’e, Arão Noe, realsa asuntu hirak ne’ebé mensiona sai preokupasaun ba Parlamentu Nasionál la’os atu dezafia Prezidente Repúblika, maibé orgaun soberanu iha separasaun poder ho nia interdependénsia tuir konstituisaun artigu 69.

Artigu 69 (Prinsípiu kona-ba haketak podér sira); orgaun soberania sira iha sira-nia relasaun ba-malu no bainhira hala’o kna’ar tenke tuir prinsípiu separasaun no interdependénsia kbiit nian ne’ebé iha Lei-Inan nia laran.

Maibé lider másimu parlamentu afirma debate OJE sei difisíl, tanba sé mak atu mai defende programa hosi ministériu ida-idak nian, enkuantu ministru balun ladauk hetan posse. Tanba tuir rejimentu, membru governu de’it mak bele defende nia polítika.

Entretantu, Prezidente Parlamentu ohin hala’o ona reuniaun ho komisaun sira atu haree kalendáriu debate, nune’e bele hasai konvite ba ministériu hotu atu mai partisipa iha audiénsia, enkuantu posibilidade debate OJE iha jeneralidade sei akontese iha 28 agora durante loron rua no espesialidade iha loron lima hafoin ba finál globál no prepara redasaun finál depois enkomenda ba Prezidente Repúblika hodi promulga.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here