Konjunta Juventude Estudante Universitáriu Timor-Leste (KJEUTL) hala’o konferénsia ba imprensa fó apoiu ba desizaun Prezidente-Repúblika, Francisco Guterres Lú Olo.

DILI, (TATOLI) – Konjunta Juventude Estudante Universitáriu Timor-Leste (KJEUTL) husu ba Primeiru-Ministru (PM), Taur Matan Ruak, atu intende malu nafatin ho Prezidente-Repúblika (PR), Francisco Guterres Lú Olo, nune’e bele troka kandidatu membru Governu na’in sia ne’ebé seidauk hetan pose.

“Ami fó apoiu tomak ba PM atu troka kandidatu membru Governu sira ne’ebé rejeita hosi Prezidente-Repúblika”, portavóz KJEUTL, Mariano Ribeiro, hato’o liuhosi konferénsia imprensa ne’ebé hala’o iha Jardim 5 de Maio, Kolmera.

Mariano argumenta timoroan barak iha Aliansa Mudansa ba Progresu (AMP) ne’ebé matenek no esperiente atu troka kandidatu membru Governu hirak ne’ebé rejeita hosi PR.

“Ami husu ba veternu, kombatente, Igreja Katólika no konfisoen relijioza sira seluk, sosiedade sivíl, akadémiku no populasan en-jerál, mai ita hamutuk luta kontra KKN (Korupsaun, Koluzaun no Nepotizmu) ne’ebé buras dadauk iha ita nia rain”, nia apela.

Iha biban ne’e, KJEUTL afirma sira nia pozisaun defende Prezidente-Repúblika nia desizaun liuhusi dalan saida de’it hodi hatán ba ultimatu ne’ebé grupu balun dirije ba Xefe-Estadu.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here