Kongresu internasionál lian Esperanto. Foto: Grupu Estudante Timorense

DILI, (TATOLI) – Prezidente Grupu Lian Esperanto, Lídia Imaculada da Conceição, informa ba TATOLI via telefone, ohin, katak  Grupu Estudante Timor ho Lian Esperanto, Teófilo José Maria de Jesus, João de Araújo Gomes da Cruz no Mateus de Sena, reprezenta Timor-Leste ba partisipa iha kongresu universál lian esperanto ba dala 103 iha Lisboa durante semana ida (28 jullu to’o 5 agostu 2018).

Lian esperanto ne’e hanesan lian neutra ne’ebé adopta husi lian oioin husi nasaun sira hodi sai hanesan lian universál ba país hothotu, tanba ne’e Timor-Leste mós hola parte husi grupu ki’ik ida hodi reprezenta Timor  iha kongresu refere.

“Ami orgullu bele hola parte no partisipa mós programa oioin no aprende buat foun husi ami-nia partisipasaun iha kongresu universál, nomós ha’u rasik halo aprezentasaun iha área ha’u-nia estudu nian iha parte medisina nian”,  haktuir Mateus de Sena iha fatin kongresu, liuhosi komunikadu ne’ebé Tatoli asesu.

Objetivu kongresu ne’e atu halo ema sai maluk ka hamosu lasu amizade entre ema husi nasaun oioin atu atinji paz iha mundu.

“Iha kongresu ne’e benefísiu oioin ne’ebé maka ami hetan iha ami-nia partisipasaun nomós ami aprezenta kona-ba parte estudu direitu nian iha UNTL”, dehan João.

Kongresu ho tema Malfermo de la universala kongresa lingvo de Esperanto abertura husi prezidente asosiasaun universál esperanto husi Canada, Mark Fettes no kontinua kedas ho aprezentasaun pesoál hodi reprezenta ba kada nasaun (nasaun 75), inklui Timor-Leste.

Eventu ne’e, iha mós aprezentasaun programa husi área oioin husi kada nasaun hanesan expozisaun arte, kursu lian esperanto, prelego, konsertu no eskursu (vizita guiada ba fatin turizmu). Kongresu ne’e organiza husi asosiasaun Portugalan Esperanto Lingvo, iha Auditorium Fakuldade Direitu, Universidade Nova Lisboa to’o loron 4 agostu 2018.

Iha loron hanesan sira kontinua sira-nia viajen ba España hodi partisipa iha kongresu internasionál ba Joven Esperantistas (74ª Internacia Junalaro Kongreso) iha provínsia Extremadura sidade Badajoz, Spaña durante semana ida (4-11 agostu).

Kongresu ne’e organiza husi Tutmonda Esperantista Junulara Organizo (TEJO), Organização Mundiál Juvenil Esperantista iha sesaun juvenil UEA nian, ho nia estrutura no diretória própriu.

“Durante atividade festivalo lingvo maka husi ami hanorin mós lian tetun ba partisipante sira seluk ne’ebé interese hodi aprende, nomós ami-nia partisipasaun másimu iha eventu sira ne’e”, dehan Mateus de Sena.

Entretantu, partisipante na’in rua (João no Mateus) finansia husi asosiasaun kongresu ba viajen, otel no alojamentu, Teófilo finansia husi Instruistino Heidi Goes husi Bélgica.

Grupu ne’e hanaran Esperanto Lingvo la Orienta Timoro, juventude estudante UNTL (Universidade Nasionál Timor Lorosa’e), husi fakuldade oioin hanesan fakuldade Agrikultura, Medisina, Direitu no Komunikasaun Sosiál kompostu husi ema na’in sanulu resin hodi ativa tinan-tinan iha kongresu sira iha rai li’ur, hanesan Korea, Austrália, Bélgica, Indonézia, Fransa, España no Portugal ba tinan ne’e.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here