Foto/Google.

DILI, (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, hatete fundu dezenvolvimentu ba negosiante hamutuk rihun 500, tuir planu sei lansa iha setembru 2018.

“Situasaun ida hanesan ne’e mai ita loke odamatan atu ajuda sira (negosiante ki’ik) mezmu osan ne’e ki’ik, se ema ida asesu ba pelu menus rihun ida sira bele fa’an sasán”, Florêncio katak iha Matadouru, ohin.

Orsamentu rihun 500 ne’e apoia husi doadór iha rai-li’ur ne’ebé besik tinan rua ona husi parte SERVE, Ministériu Turizmu Komérsiu Indústria (MTKI), Banku Sentrál Timor-Leste asina akordu hamutuk ho United Nations Development Programme UNDP), maibé to’o agora laiha ema ida mak asesu.

Tanba ne’e ekipa UNDP, MTKI no SERVE tuur hamutuk haree fali kritériu ida, nune’e fundu ki’ikoan ne’ebé iha liuhusi UNDP, vendedór sira bele asesu.

“Semana ida liubá foti ona desizaun hamutuk, Ministériu Komérsiu no UNDP para halo filafali dokumentu legál ne’ebé iha ona atu halo moris filafali, nune’e osan ne’ebé iha ne’e maluk sira bele asesu”, katak.

Florêncio dehan konkordánsia ne’ebé halo tau ona kritériu sira atu lori ba ministériu tutela hodi aprova no lansa iha fulan-oin.

“Hodi fó netik dalan ba negosiante ki’ikoan sira asesu para halo modo, tomate bele folin, se la’e laiha liu. Kritériu halo ona daudaun no envolve SERVE ho MCI atu lori bá Konsellu Ministru aprova. Ida ne’e ha’u-nia planu atu tau ba loron 100, ministru ne’ebé tuur para aprova lalais, tanba osan ne’e la’ós orsamentu Estadu”, tenik.

Nia dehan UNDP no Ministériu Komérsiu konkorda ona atu halo lansamentu iha setembru, pelu menus ema ida ka rua bele asesu ona.

Diretór Ezekutivu afirma osan ne’e sei foku liu ba área agrikultura no pekuária.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here