Membru Parlamentu Nasional. Imajen/dok.TATOLI

DILI, (TATOLI)- Parlamentu Nasionál (PN) liuhosi votasaun iha plenária, fó votu pezar solidaridade ba vítima rai nakdoko iha Lombok, Indonézia ho unanimidade husi 59 deputadu prezente.

“Aprovasaun projetu rezolusaun ne’e ho objetivu fó votu pezar ba akontesimentu rai nakdoko iha Lombok, Repúblika Indonézia”, tenik Prezidente Parlamentu Nasionál (PPN), Arão Noe, iha plenária, ohin.

Liuhosi deklarasaun votu pezar, PN espressa sentidu kondolénsi ba família vítima no manifesta solidaridade ba autoridade Indonézia.

Antes ne’e, iha loron 1 agostu Governu da-ualu liuhosi reuniaun Konsellu Ministru (KM) aprova rezolusaun governu ba donativu ho montante US$750.000 ba Repúblika Indonézia hodi apóiu vítima rai nakdoko iha Lombok.

Entretantu iha loron 27 jullu madrugada, rai nakdoko ho magnitude 6,4 eskala richer, tuir dadus husi autoridade ema na’in 17 mak mate, 401 kanek, no ema na’in 10.062 ne’ebé mak hela besik fatin akontesimentu besik Foho Rinjani, evakua ba fatin evakuasaun provizóriu.

Alende ne’e, dezastre naturais ne’e rezulta uma hamutuk 5.448 mak aat, 15 fasilidade edukasaun, lima fasilidade saúde mak aat no fasilidade públiku seluk tan.

Iha loron 6 agostu, rai nakdoko ba daruak ho magnitude 7 eskala richer akontese tan iha Lombok no dadus ikus husi autoridade rezista 321 mak mate iha Lombok no 2 mak mate iha Bali, ema nain 270.168 mak evakua ba fatin evakuasaun provizóriu, uma hamutuk 67.875 mak aat no edifísiu seluk tan mak aat husi dezastre naturais ne’e.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here