Membru Parlamentu Nasional. Imajen/dok.TATOLI

DILI, (TATOLI) – Parlamentu Nasionál (PN) liuhosi votasaun iha plenária, aprova pedidu karaktér urjénsia husi governu ba Proposta Lei Orsamentu Jerál Estadu (OJE) 2018, nune’e relatóriu pareser ne’ebé aprezenta husi Komisaun C ne’ebé trata asuntu Finansa Públika passa ho rezultadu a favor 40, kontra 0 no abstensaun 24.

“Ho rezultadu ne’ebé iha Projeitu Lei Orsamentu Jerál Estadu 2018 passa no prosedimentu diskusaun no debate tuir karakter urjénsia ne’ebé aprezenta husi Komisaun C passa no ita hotu sei kumpri regra sira iha”, tenik Prezidente Parlamentu Nasionál, Arão Noe, iha plenária, ohin.

Hodi hatutan: “Prosesu normal kuandu orsamentu tama ita laiha plenária ona ba oin, so kuandu iha karakter urjénsia ruma mak ita konvoka liuhosi konferénsia líder bankada mak sei deside halo plenária ka la’e. Atu informa komesa aban ba oin ita laiha plenária, tanba tempu ba komisaun sira atu halo atividade atu liga ba audénsia no prosesu ba diskusaun no aprovasaun Orsamentu Jerál Estadu”.

Ministru Reforma Lejislativa no Asuntu Parlamentár, Fídelis Leite Magalhães, hateten preokupasaun husi parte governu nian mak governu tenke haree prosesu rua dala ida, OJE 2018 no OJE 2019 (tuir planu sei tama iha 15 outubru).

Kuandu prosesu ba OJE ba 2018 sei dada tan, rua ne’e sei overload iha dalan. Ezersísiu ne’ebé mak Ministériu Finansa halo mós halo ho esforsu tomak no ami rekoñese sei iha dokumentu balun ne’ebé mak seidauk kompletu, maibé ami promete katak ami sei lori mai parlamentu ida ne’e bainhira prosesu ne’e hahú”, tenik.

Entretantu tuir kalendáriu ne’ebé aprezenta husi Komisaun C liuhosi relatóriu pareser, debate ho karaktér urjénsia sei han tempu ba audiénsia públika ho komisaunn sira loron 15 hatun ba loron 6, komisaun C ne’ebé mak iha loron 5 hatun ba loron 4, diskusaun no votasaun iha jeneralidade ne’ebé mak loron 3 hatun ba loron 2, diskusaun no votasaun iha espesialidade loron 10 hatun ba loron 5.

Total tuir rejimentu internu Parlamentu Nasionál bainhira diskusaun normál loron 30, maibé diskusaun ho karaktér urjénsia sei han loron 17.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here