Ministru Reforma Lejizlativa no Asuntu Parlamentár, Fidelis Leite Magalhães, ko'alia hela iha plenaria PN, bainhira nia asume knaar hanesan Deputadu hosi bankada PLP

DILI (TATOLI) – Ministru Reforma Lejizlativa no Asuntu Parlamentár, Fidelis Leite Magalhães informa, parte governu iha planu atu hari ponte ou tunel ba pedestre (la’o-ain) sira iha auto estrada.

“Preokupasaun ba auto estrada ne’ebé mak difikulta asesu populasaun ba sira nia toos. Governu iha planu hari ponte ou tunel rua no ninia detalhas téknika sira sei fornese tuir mai, maibé ida ne’e sira toma nota no halo ona levantamentu ba kestaun ne’e”, tenik iha plenária bainhira hatán ba preokupasaun deputadu sira konaba ezisténsia auto estrada iha Suai.

Hodi dehan, informasaun ne’e to’o ona iha Ministériu Obras Públika tanba  ne’e sira haruka ona ekipa hodi hare hodi bele hari tunel ou ponte para atu liu husi estrada ne’e.

Entretantu projetu auto estrada husi Suai to’o Beaço, Viqueque tuir dezeñu ninia naruk 30.355 kilómetru no luan 25 metru ho konstrusaun sei halo iha faze haat.

Faze dahuluk hosi Suai ba Fatukai, faze daruak hosi Fatukai ba Betano, faze datoluk hosi Betano ba Natarbora no faze daikus hosi Natarbora ba Beaço.

Kustu ba konstrusaun no supervizaun auto estrada husi tinan 2012-2017 hamutuk US$ 535 millaun, la inklui kustu sira konaba estudu viabilidade (feasibility study), estudu detalladu tékniku (detail engineering design), no indemunizasaun ba rai.

Jornalista: Julia Chatarina

Editór : Manuel Pinto

 

HAKEREK NO HATÁN

Please enter your comment!
Please enter your name here