Diretór Nasionál Finansas Estadu, Salomão Yoaquim (karuk), Xefe Gabinete Komunikasaun no Informasaun MF, Agostinho Castro (klaran) no Diretór Jerál Finansas Estadu, Januário da Gama. Foto/MF.

DILI, (TATOLI) – Ministériu Finansas (MF) sei distribui Dotasaun Orsamentál Temporária (DOT) agostu 2018 ba orgaun Estadu sira atu gasta ba atividade no funsionamentu mákina Estadu hamutuk $113,409,148 ne’ebé inklui despeza empréstimu. Bainhira esklui tiha empréstimu totál DOT hamutuk $104,923,669.

Xefe Gabinete Komunikasaun no Informasaun MF, Agostinho Castro, hatete DOT iha fulan ne’e hetan kreximentu signifikativu husi jullu 2018 hamutuk porsentu 16.5 ne’ebé inklui despeza empréstimu.

“Diferensa boot ne’e aumenta husi pagamentu idozu ba fulan neen nian, apoia finanseira internasionál no despeza sira seluk”, Castro afirma ohin liuhosi konferénsia imprensa iha Aitarak-Laran.

Diretór Jerál Finansas Estadu MF, Januário da Gama, esplika relasiona ho kreximentu signifikativu 16.5% ne’e iha prosesu alterasaun dekretu DOT iha Konsellu Ministru fulan kotuk halo ona esesaun hodi halo pagamentu ba idozu sira husi Ministériu Solidariedade Sosiál no Inkluzaun (MSSI).

“Antigamente ida ne’e ita latau, maibé tanba arranja interna ne’ebé Ministériu Solidariedade Sosiál halo katak pagamentu idozu ne’e sira halo fulan neen dala ida, entaun alokasaun ida agora ita tau iha Dotasaun Orsamentu Temporáriu fulan-agostu nian ne’e inklui mós despeza ba pagamentu idozu nian”.

Januário hatutan DOT fulan ne’e hola reflesaun de’it ba kustu mákina no operasionál hodi asegura katak administrasaun públika kontinua la’o nafatin.

“Entaun despeza ne’ebé mak tau ne’e hanesan despeza normál husi kálkulu orsamentu duodésimu nian”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here