Foto Media FDCH

DILI (TATOLI)—Ministério Ensino Superior, Ciência e Cultura (MESCC) liuhosi Fundo de Desenvolvimento do Capital Humano (FDCH) iha loron 23 fulan Agostu tinan ne’e sei lansa programa Bolsa Estudo iha área Telekomunikasaun ba Timoroan.

Númeru Bolsa Estudu ne’ebé mak sei oferese ba Timoran hamutuk 10, liuhosi servisu hamutuk entre MESCC, Ministério Transporte e Comunicacão (MTC) no Kompañia Telkomcel.

Enkuantu kandidatus Bolseirus sei liuhosi faze selesaun bazeia ba méritu, prosesu ne’e rasik sei fasilita hosi MESCC,MTC, Telkom University, Sekretariadu Tékniku FDCH no Telkomcel.

Entretantu Bolsa Estudu refere oferese hosi Kompañia Telkomcel- Indonesia liuhosi Telkom University, iha tinan 2014 Telkom University mós  oferese tiha-ona bolsa estudu hamutuk 10 ba timoroan, nain 3 mak remata ona sira nia estudu no servisu iha Kompañia Telekomcel iha Timor-Leste.

Iha parte seluk Ministro Ensino Superior, Ciência e Cultura Longuinhos dos Santos mós koalia konabá oinsa FDCH bele identifika Proporsionalidade kursu ba dosente iha kada departamentu iha Universidade Nasional Timor-Leste (UNTL).

Tanba tuir Ministru Longuinhos katak durante ne’e iha universidade refere seidauk iha ballansu grau akadémiku dosente sira iha kada departamentu.

Iha tempu hanesan, diskuti mós kona-ba FDCH atu tutela ba MESCC maibe sei haktuir Lei Orgániku VIII Governo ne’ebé sei iha prosesu promulgasaun hosi Prezidente da Republika.

Sorumutu refere realiza iha Ministério Ensino Superior, Ciência e Cultura (MESCC) Villa Verde, Dili no partisipa husi Ministru MESCC Sr. Longuinhos dos Santos, Sekretáriu Ezekutivu FDCH Sr. Isménio Martins da Silva, Asesor sira, no Koordenador Gabinete Planu, Fiskalizasaun no Verifikasaun FDCH nian.

Ekipa Redasaun     

HAKEREK NO HATÁN

Please enter your comment!
Please enter your name here