Sekretáriu Estadu Komunikasaun Sosiál, Merício Juvenal dos Reis "Akara". Foto/Egas Cristovão.

DILI, (TATOLI)-Sekretáriu Estadu Komunikasaun Sosiál (SEKOMS), Merício Juvenal dos Reis “Akara” hasoru malu ho formadóra língua portugeza ba jornalista hodi ko’alia kona-ba sustentabilidade formasaun ne’ebé posibilidade sei termina iha tinan oin. Atu asegura nia kontinuidade maka sei prepara ekipa  timoroan sira atubele fó kontinuasaun ba kursu ne’e.

“Kolega sira mai fó hanoin kooperasaun ida ne’e iha posibilidade tinan oin remata ho Instituto Camões ne’ebé apoia husi embaixada Portugál, entaun iha hanoin oinsá mak nia kontinuidade ita bele prepara ekipa ida para sira fó treinu na’in-haat hanesan ne’e para aban-bainrua (profesora) sira remata misaun, ita-nia ema Timór bele sai editór di’ak iha notísia portugés tanba daudaun ne’e sira mak tau matan hotu”, Merício hatete bainhira hasoru malu ho formadora língua portugeza iha Palásiu Governu, horisehik.

Nune’e SEKOMS hanoin katak depois projetu ne’e hotu Timór bele halo serbisu ida ne’e, sai editór di’ak ba mídia sira. “Ha’u konkorda ideia ida ne’e, SEKOMS sei haree, prepara ema para sira fó kursu tinan ida ou tinan ida ho balun atu sai editór di’ak ba notísia portugés”, katak.

Aleinde ne’e formadora sira iha enkontru ne’e mós fó hanoin katak jornalista balun iha ona nivel avansadu loos, maibé balun sei iha báziku hela.

“Ita nota hela balun halo notísia iha portugés, mídia balun hahú hakerek iha língua portugeza, maibé dalaruma hakerek sala termu balun no sira mós informa ne’ebé ita hotu tenke tau matan tanba termu kuandu sala nia signifika mós diferente, ne’ebé bainhira halo notísia nia termu tenke loos, ne’ebé kolega sira mai atu fó hanoin, ajuda ita atu garante kualidade versaun portugés”.

SEKOMS fó obrigadu ba formadora sira tanba ajuda ona jornalista liuliu iha língua nomós hanorin oinsá hakerek notísia ho konteúdu di’ak. “Ita fó obrigadu ba sira-nia apoia, Instituto Camões, embaixada Portugál iha ne’e, no espera tinan ida, rua mai kooperasaun bele kontinua no SEKOMS sei halo nia parte para sustentabilidade ne’e bele iha”.

Diretór Nasionál Diseminasaun Informasaun (DNDI), Orlando da Conceiçao, hatutan bainhira projetu ne’e hotu, atu asegura nia kontinuidade entaun presiza timoroan sira ne’ebé prepradu atu kontinua formasaun tanba daudaun ne’e profesora sira  aumezmu tempu fó kursu halo mós revizaun ba notísia portugés husi formandu sira.

“Liuliu Timor Post, Independende ho Diáriu, entaun sira presiza iha timoroan própriu atu halo serbisu ida ne’e, ne’e mak sira husu hela ba Sekretáriu Estadu para bele asegura hela nia kontinuidade, entaun sira presiza karik rekrutamentu pesoál ne’e mai husi SEKOMS nian depois serbisu hamutuk ho sira agora daudaun”.

Hatutan formadora sira ne’e bele fasilita hanesan fó akompañamentu ba timoroan sira ne’e hafoin kursu ne’e termina, sira bele halo ona serbisu ida ne’e. Tanba ne’e pesoál timoroan ne’ebé sei halo knaar ne’e tenke hatene portugés no mínimu domina iha área jornalizmu nian ho intesaun atu serbisu hamutuk ho mídia hotu liuliu iha redasaun.

Formadora língua portugeza, Cláudia Taveira, hatete formasaun ne’e iha dezafiu balun tanba ekipa iha ema na’in-rua de’it tanba ne’e presiza reforsa ekipa ne’e nomós apoiu husi órgaun komunikasaun sosiál.

“Ami espera jornalista bele hakerek avontade iha portugés no pratika barak no kontaktu ho língua la’ós iha de’it saladeaula, mas bele iha serbisu fatin, uma no kontestu seluk”.

Cláudia husu ba formandu sira kontinua aprende tanba prosesu aprendijazen dalen ida kle’ur liu no pratika maka barak.

Jornalista : Maria Auxiliadora

Editór  : Manuel Pinto

HAKEREK NO HATÁN

Please enter your comment!
Please enter your name here