Reitór UNTL, Francisco Miguel Martins

DÍLI, (TATOLI)-Universidade Nasionál Timor Lorosa’e (UNTL) koopera ho Universidade do Porto (UP) sei loke kursu mestradu inklui dotoramentu iha área língua portugeza nomós matématíka iha UNTL. Kursu rua ne’e sei oferese oportunidade 60. Katak, língua portugeza 30 no matemátika 30 ba interesadu sira.

Informasaun ne’e fó sai husi reitór UNTL, Francisco Miguel Martins, ba jornalista sira, iha marjen tomada de pose ba xefe departamentu no seksaun, UNTL nian, iha salaun Ministériu Obras Públika no Telekomunikasaun (MOPTK), Díli, ohin.

Akadémiku ne’e relata katak iha abril, fulan hirak kotuk, UNTL, liliu reitór hetan konvite husi reitór sira, espesialmente reitór husi Uniaun Europeia (UE) hodi partisipa iha konferénsia internasionál nível reitór UE nian.

Tanba ne’e, nu’udar reitór, iha biban ne’e mós aproveita halo kolaborasaun ho universidade portugeza sira nian. UNTL sempre halo kooperasaun bilaterál nomós multilaterál, iha kazu ida ne’e, ho Universidade do Porto.

“Ami halo kolaborasaun ho departamentu matemátika no língua portugeza. Ami iha akordu asinadu ho Universidade do Porto atu institunasionaliza mestradu iha estudu matemátika ba profesór matemátika nomós língua portugeza, tuir kontextu Timor-Leste atu nune’e reforsa defisiénsia iha matéria rua ne’e,” informar reitór UNTL, Francisco Miguel Martins.

Reitór ne’e mós haktuir katak bainhira nia sei nu’udar peskizadór iha UNTL, hamutuk halo levantamentu dadus ho Banku Mundiál nota katak área matemátika no língua portugeza iha ensinu báziku iha kintu, sestu no sétimu ano, rezultadu diagnóstiku hatudu katak matéria rua ne’e mak nia valór ki’ik liu.

“Entaun, ha’u hanoin tiha ona atu ‘kura’ ida ne’e. Maibé devia ida ne’e, Ministériu Edukasaun mak reforsa área rua ida ne’e, maibé la akontese hodi eleva kualidade,” dehan reitór UNTL.

Tanba ne’e, tuir reitór, husi ministru edukasaun ida ba seluk iha governasaun sira antes ne’e, nunka realiza prosesu ne’e hodi bele alavanka defisiénsia iha área rua ne’e.

“Entaun, ha’u hanoin tiha ona, bainhira sei hanesan pró-reitór asuntu peskiza (iha UNTL), nune’e bainhira simu tiha pose nu’udar reitór, nunka rona liu, ministru ida mai no ba, ko’alia hodi halo ida ne’e. Tanba ne’e bainhira ha’u hala’o kna’ar nu’udar reitór hanoin ona; presiza alavanka defisiénsia ida ne’e, nu’udar investimentu ida ba kualidade profesór,” akresenta reitór.

Reitór Universidade Públika ne’e informa katak atu estuda iha área rua ne’e, UNTL hala’o selesaun dokumentu, entrevista ba konkorente sira ne’ebé interese atu estuda iha área rua ne’e.

“Tinan oin, formalmente sei hala’o ona prosesu ensinu aprendijajen no andamentu área rua ne’e; matemátika no língua portugueza hodi alavanka (reforsa),” dehan reitór Francisco Miguel Martins.

“Iha tinan oin mós UNTL sei institusionaliza programa mestradu iha estudu ba direitu tasi nian no seguransa marítima tanba ita-nia país hale’u husi tasi. Entaun ita presiza hanoin oinsa bele proteje no asegura ita-nia tasi,” reforsa akadémiku ne’e.

Entretantu, to’o ohin loron, UNTL halo ona kooperasaun iha área oioin ho organizasaun internasionál akadémiku sira iha kontinente Áfrika, Ázia, Europa no Oseania.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here