Sekretáriu Estadu Komunikasaun Sosiál, Merício Juvinal dos Reis Akara, ho profesora konsultó lian-portugés ba jornalista, Claúdia Taveira, iha Palasiu Governu, ohin. Foto Egas Cristovão

DILI, (TATOLI) – Fundu Uniaun Europea (UE) ba Timor-Leste kontinua apoiu Governu hodi promove governasaun di’ak iha futuru.

Jestór ba Programa Fundu Dezenvolvimentu UE iha Ministériu Negosiu Estranjeiru no Koperasaun, Gregório Pereira da Silva, hato’o hafoin hasoru malu ho Sekretáriu Estadu Komunikasaun Sosiál, Merício Juvinal dos Reis Akara, iha Palasiu Governu, ohin.

Fundu UE ba programa governasaun di’ak ba futuru hamutuk milliaun euro 30. EU konsidera SEKOMS hanesan parseiru importante atu desimina no promove Governasaun di’ak liuhosi publikasaun informasaun ba públiku.

ʺEnkontru ne’e  para haree oinsá SEKOMS servisu hamutuk ho Institutu Camões hodi halo supervizaun no kontrolu ba finansa públika, liuliu iha formasaun ba rekursu umanu no konsultória hodi dezenvolve regulamentu no  norma ne’ebé insituisaun ne’e presizaʺ, hateten jestór ba fundu UE.

Organizasaun internasionál ne’e fó ona apoiu ba TL iha setór dezenvolvimentu rurál no boa governasaun durante tinan barak.

Entretantu, Mericio Akara hateten parte ezekutivu kompromete hametin kooperasaun ho organizasaun ne’e  hodi promove liután boa governasaun.

ʺAmi intende malu oinsá apoiu área komunikasaun sosiál, apoiu mídia liuliu kapasitasaun ba mídiaʺ, dehan governante.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here