Primeiru-Ministru aprezenta programa governu iha Parlamentu Nasionál.

DILI (TATOLI) – Meza Parlamentu Nasionál (PN) liuhosi reuniaun plenária estraordinária, baixa ona proposta Orsamentu Jerál Estadu (OJE) 2018 husi Governu ho pedidu karakter urjénsia ba Komisaun C, ne’ebé trata asuntu Finansas Públika.

“Proposta OJE 2018 mai ho pedidu ho karakter urjénsia, tanba  ne’e tuir rejimentu tenke baixa ba Komisaun C, maibé ami baixa mós ba komisaun seluk para hetan apresiasaun inisiál. Hafoin Komisaun C aprezenta relatóriu iha 24 horas nia laran”, informa Prezidente PN, Arão Noe iha plenária, ohin.

Hodi dehan, hafoin baixa, Komisaun C sei halo relatóriu pareser no lori ba plenária hodi hetan apresiasaun se prienxe kritériu ba pedidu urjénsia ou lae no sei fiksa kalendáriu ba debate OJE 2018.

Prezidente Komisaun C, Deputada Fernanda Lay husi bankada CNRT esplika, pedidu urjénsia ne’e mai husi Governu no ida ne’e nia parte sei trata.

“Auzénsia OJE kuaze durante tinan ida nia laran, ne’ebé ita la’o ho rejime duodecimal. Billion US$1,2 ne’e engloba (integra-red)  tuir lei jestaun finanseira, despeza ne’ebé halo dezde Janeiru to’o agora para  ita bele tama iha funsionamentu normal iha 2019, se lae ita laiha separasaun gastu nian”, nia esplika hodi promete Komisaun C prontu hato’o relatóriu ba pedidu urjénsia husi governu.

Maski nune’e, relatóriu pareser sei aprezenta iha 24 horas nia laran, maibé apresiasaun ba pedidu urjénsia husi Governu sei realiza iha segunda hodi deside kalendáriu debate ba orsamentu. Bainhira diskusaun la’o normal presiza loron 33 ba debate orsamentu.

Proposta OJE 2018 ho montante biliaun US$ 1,2 ne’e, Governu hatama ba meza PN iha loron 7 Agostu. Ho montante ne’e sei kobre tinan tomak husi fulan Janeiru to’o Dezembru 2018.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here