Prezidente KFP, Faustino Cardoso. Foto Egas Cristovão

DÍLI, (TATOLI)-Prezidente KFP, Faustino Cardoso Gomes fó atensaun ba empossado  na’in 39 ne’ebé selesionadu tuir méritu, hodi hala’o kna’ar nu’udar xefe departamentu no xefe seksaun iha universidade públika atu asegura serbisu ho responsabilidade, profisionál, lais, izentu, imparsiál ka la hali’is ba interese ema ida eh grupu ida ka partidu ida nian maibé haree de’it ba interese estadu nian, liuliu interese UNTL.

“Tanba ida ne’e mak ohin, ami subliña importánsia kona-ba atu serbisu ho responsabilidade, ho profisionál, ho kualidade, ho lalais i buka hadook aan husi tentasaun ne’ebé bele prejudika integridade funsaun públika ninian i bele mós prejudika sira-nia karreira iha futuru oin mai,” esplika prezidente KFP, iha salaun MOPTK (Ministériu Obras Públika no Telekomunikasaun), Caicoli-Díli, ohin.

Nune’e, Prezidente Faustino Cardoso konsidera katak eventu toma pose ne’e di’ak tebes tanba, primeiru, bele haforsa responsabilidade empossado  sira nian liuhusi asinatura termu aseitasaun no iha tempu hanesan sira iha oportunidade atu rona mensajen sira hodi hametin sira-nia servisu iha fatin ida idak ninian ho responsabilidade.

“Ne’e eventu formalizasaun husi rezultadu konkursu ba selesaun tuir méritu, iha ne’ebé sira rasik mak sertifika. Katak, kompetente iha kargu sira ne’ebé mak sira konkorre no prontu atu asume ho responsabilidade, profisionál, izentu no kualidade,” hateten prezidente KFP, Faustino Cardoso Gomes, perante media.

Enkuantu, reitór UNTL, Francisco Miguel Martins hateten katak UNTL nu’udar instituisaun boot ida no iha departamentu oioin, seksaun oioin mós. Tanba ne’e, presiza ezerse funsaun hodi serbi estudante sira ne’ebé estuda iha UNTL.

“Ida ne’e hatudu katak dinámika prosesu dezenvolvimentu institusionál; administrasaun, jestaun, edukasaun no peskiza sientífika. Signifika, tomada de pose ohin ne’e nu’udar responsabilidade ida ne’ebé atribuída ba ita-nia funsionáriu sira ne’ebé konkorre iha rekrutamentu tuir méritu,” akresenta reitór Francisco Miguel Martins.

Nia informa katak rekrutamentu ne’ebé UNTL halo ba funsionáriu sira ne’e ho kolaborasaun ho KFP. UNTL elabora pontu prinsipál sira no rekruta tuir koñesimentu ne’ebé estabelese husi KFP.

“Tanba sira sei hala’o sira-nia funsaun iha Universidade Nasionál Timor Lorosa’e. Tanba universidade ne’e boot, luan, iha departamentu oioin, unidade, hodi sira bele asume funsaun sira ne’e hodi serbi ita-nia formandu sira, alunu; futuru jestór, lideransa ba país ida ne’e iha prosesu dezenvolvimentu iha futuru,” dehan reitór ne’e.

“Entaun, eventu ida ne’e nu’udar serimónia ida atu konkretiza sira-nia kompromisu antes toma sira-nia responsabilidade, ezerse sira-nia funsaun nu’udar diretór, nu’udar xefe seksaun,” reitór hatutan.

Adelaide Maria Filipa da Cunha, emposada ida, iha nia entrevista ba jornalista sira hateten katak sente kontente ho kargu ne’ebé nia simu. Maski nune’e nia akresenta, kontente maibé ho responsabilidade boot.

“Hahú ohin, tula ona mai ami-nia kabas nu’udar funsionáriu públiku ida. Bainhira simu kargu, ami hahú hanoin ona katak iha responsabilidade ida ne’ebé mak ami tenke tuir. Entaun, ami la’ós de’it kontente ba ami-nia karreira maibé responsabilidade ne’ebé ami hetan oinsá ezekuta ho di’ak,” dehan emposada ne’e.

Xefe Departamentu Media no Komunikasaun UNTL ne’e espera katak hafoin simu pose husi KFP bele halo mudansa la’ós husi sira-nia aan rasik mesak maibé ekipa.“Iha departamentu ne’ebé ami atu ba, ami espera ami mós bele aprende husi sira, sira mós aprende husi ami. Nune’e ami bele kolabora hamutuk hodi lori universidade ne’e ba oin,” nia dehan.

Xefe Adelaide Maria Filipa da Cunha reforsa katak bainhira konkore ba pozisaun ida ne’e seidauk iha koñesimentu di’ak kona-ba pozisaun ne’ebé nia asume ligadu ho media.

Maske nune’e, nia kompromete katak hanoin balun ne’ebé nia iha, liuhusi observasaun direta iha fatin ne’ebé nia sei haknaar aan ba hodi bele hala’o servisu ho responsabilidade.

“Nune’e ami bele tau hamutuk ideia. Saida mak iha ona, ita tenke kontinua ba oin no ida ne’ebé presiza hadi’a sei kolabora ho ekipa sira hodi bele tau ba manuál, atividade, prioridade saida mak atu halo liuliu ba iha instituisaun nia programa,” nia garante.

Entretantu, tomada de pose ba kargu xefia iha nivel departamentu no seksaun bazeia ba desizaun KFP nú. 2906/2018/CFP. Empossado  sira ne’e kompostu husi xefe departamentu na’in 35 no xefe seksaun na’in haat, ne’ebé kompostu husi feto na’in 17 no mane na’in 22.

Jornalista: Rafy Belo

Editór : Manuel Pinto

 

HAKEREK NO HATÁN

Please enter your comment!
Please enter your name here