Diretór Jerál Alfándega, Minstériu Finansa, José António Fátima Abílio. Foto/Egas Cristovão.

DILI, (TATOLI)- Diretór Jerál Autoridade Aduaneira (AA), José António Fátima Abílio, dehan situasaun ne’ebé akontese iha rai-laran (impasse) ema balun aproveita oportunidade hodi halo mós importasaun ilegál.

“Ho situasaun sira ne’e ita haree katak volume importasaun ilegál sira ne’e mós maka’as, sira aproveita oportunidade, ne’ebé agora mak ami halo kooperasaun ho Polísia Militár back up tanba ita hatene Alfándega laiha kilat, ne’ebé risku boot bainhira ita bá hasoru ema sira ne’ebé halo atividade nakonu ho krime, ne’ebé ami buka back up ho sira no konsege ka’er”, Abílio katak iha eis edifísiu Ministériu Finansas, ohin.

Nune’e Alfándega espera kontrolu ne’e la’o nafatin la’ós de’it bá parte tasi, maibé fronteira terrestre sira ne’e servisu hamutuk ho Unidade Patrullamentu Fronteira (UPF) atubele halo vijilánsia ho di’ak liután.

Diretór Jerál ne’e hatutan husi fonte AA nia informa katak sasán ne’ebé hatama barak liu mak mina no tabaku tanba importadór ilegál sira hatene katak Timor-Leste konsome sigarru maka’as.

“Pur enkuantu mina ho tabaku ne’e mak sira halo deskarregamentu ilegál iha ita-nia tasi. Ba nesesidade bázika sira seluk seidauk, talvés volume ki’ik sira ne’e mak mai husi fronteira terrestre nian. Ne’e ami labele kontrola hotu tanba ami konsentra liu iha postu integradu, agora sira seluk ne’e ami servisu hamutuk ho UPF no ami labele bá mesak”, katak.

Abílio relata foin daudaun ne’e AA halo ekipa konjuntu ida ho Polísia Militár ka’er ema ne’ebé hatama mina ho ilegál pur volta tonelada 10 ne’ebé prosesu ne’e identifika hotu ona no agora entrega ba Polísia investigasaun munisípiu Bobonaru para halo prosesu.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here