Faustino Cardoso

DÍLI, (TATOLI)-Prezidente Komisaun Funsaun Públika (KFP), Faustino Cardoso Gomes relata ba profisionál komunikasaun sosiál sira, ohin, iha salaun iha salaun MOPTK (Ministériu Obras Públika no Telekomunikasaun), Caicoli-Díli, katak dosente no profesór sira halo parte ba KFP tanba sira funsionáriu públiku.

To’o ohin loron ita iha tiha ona réjime seguransa sosiál komprensivu ida maibé prosesu atu tama ba reforma ne’e depende ba proposta rekerimentu ema idaidak ninian.

“Kuandu dosente sira sente aan, idade to’o ona 60 i sente prontu ona atu ba deskansa liuhusi reforma, sira hato’o rekerimentu ba iha Komisaun Funsaun Públika i Komisaun Funsaun Públika sei prosesa tuir kompeténsia ne’ebé mak iha; hasai sertifikadu antigidade serbisu, hamutuk ho Ministériu Solidariedade Sosiál inkluzaun atu oinsa prosesu sira-nia reforma,” esplika prezidente KFP.

“Dala ida tan, reforma ba profesór sira hanesan mós reforma ba funsionáriu públiku enjerál, ne’ebé depende ba rekerimentu ne’ebé sira idaidak tenke hatama. Kuandu Komisaun Funsaun Públika simu ona, prosesa ho sira-nia reforma inklui pensaun tuir situasaun idaidak ninian,” reforsa prezidente Faustino Cardoso Gomes.

Autoridade másima KFP ne’e informa katak to’o ohin loron profesór sira ne’ebé hatama ona rekerimentu ba reforma laduun barak maibé barak liu mai husi funsionáriu jerál, réjime jerál nian.

“Kona-ba réjime espesiál sira ne’e, to’o ohin loron, Komisaun Funsaun Públika seidauk rejista númeru barak, númeru aas,” relata prezidente KFP, Faustino Cardoso Gomes hodi konklui.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here