Sekretáriu Estadu Komunikasaun Sosiál, Merício Juvinal dos Reis Akara, hafoin hasoru malu ho Sekretáriu Estadu ba Polítika Formasaun Profesionál no Empregu (SEPFOPE), Júlio da Silva, iha Kaikoli, ohin. Foto Egas Cristovão

DILI, (TATOLI) – Sekretáriu Estadu Komunikasaun Sosiál (SEKOMS), Mericio Juvinal dos Reis Akara, hateten parte SEKOMS iha obrigasaun atu divulga polítika no programa Governu daualu ba públiku.

Governante hato’o asunto ne’e hafoin enkontru ho Sekretáriu Estadu ba Polítika Formasaun Profisionál no Empregu  (SEPFOPE), Júlio da Silva, iha Kaikoli, ohin.

Mericio hateten SEKOMS presiza divulga programa SEPFOPE hanesan sentru formasaun Tibar munisipiu Likisa, no sentru formasaun sira seluktan iha munisipíu   ba públiku hodi  asesu.

“Sentru formasaun Tibar ne’e di’ak tebes, tanba ne’e SEKOMS nia obrigasaun maka komunika programa hirak ne’e ba públiku atu akompañaʺ, hateten nia.

SEKOMS mós iha planu enkaixa kuríkulu kona-ba formasaun ba jornalista sira iha área rurál liuhosi sentru formasaun ne’ebé SEPFOPE estabelese iha munisípiu.

ʺDuke ami harii fali sentru formasaun ketak, tanba ne’e ami ko’alia para iha sentru formasaun sira ne’ebé iha ita aumenta de’it kuríkulu kona-ba formasaun ba jornalista sira, oinsá atu sai fotografer, hakerek notisias di’akʺ, hatutan.

Sei Kria Sentru Ba Mídia Iha Palásiu Governu

Biban ne’e, Merício Akara haktuir SEKOMS iha ona planu kooperasaun  atu estebelese sentru ba mídia hodi fasilita jornalista bainhira hala’o Kobertura iha Palásiu Governu.

Sentru ba mídia ne’e tuir Akara importante hodi fasilita. Sentru ne’e sei kompleta fasilidade komputadór, no WIFI gratuita ba jornalista.

ʺAmi rua ko’alia atu inisia sentru  mídia ida, hahú infraestrutura bázika, WIFI ba jornalista siraʺ, tenik tan.

SEPFOPE iha rekursu sufisiente atu halo instlasaun ba sentru ne’e tuir pedidu SEKOMS.

Entretantu, Sekretáriu Estadu, Júlio da Silva, hateten SEFPOFE prontu atu estabelese kooperasaun. “Ita nia maluk joven sira ne’ebé hetan formasaun iha sentru formasaun iha kreatividade no kapasidade atu halo instalasaun tuir nesesidade jornalista siraʺ, afirma tan.

Programa ne’e iha posibilidade sei implementa iha tinan oin hodi enkaixa iha Orsamentu Jerál Estadu 2019.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here