Dekanu Fakuldade Ekonomia no Jestaun (FEJ) Universidade Nasionál Timor Lorosa’e (UNTL), Fernando Baptista Anuno. Foto/Google.

DILI, (TATOLI) – Dekanu Fakuldade Ekonomia no Jestaun (FEJ) Universidade Nasionál Timor Lorosa’e (UNTL), Fernando Baptista Anuno, hatete fatór prinsipál ne’ebé influénsia hela kreximentu ekonómiku país nian mak kestaun polítika, nune’e akontese balansu entre prokura no oferta osan agora ne’e laiha.

“Dezde ita-nia eleisaun jerál to’o iha formasaun Governu konsege la’o de’it fulan sia ita tama kedan iha eleisaun antesipada no até agora ita enfrenta hela situasaun polítika ne’ebé sei influénsia hela mezmu formasaun Governu la’o daudaun no infelizmente seidauk kompleta”, Anuno afirma iha Kampus Sentrál UNTL, ohin.

Ekonomista timoroan ne’e dehan ita-nia prokura ne’e aumenta, oferta orsamentu diminui no maioria oferta osan ne’e husi setór importante ne’ebé mak kontribui ba kampu traballu iha setór públiku mak funsionáriu pur funsionáriu volta rihun 35 kompara ho setór privadu, ajénsia nasionál no internasionál.

“Orsamentu Estadu sei tama hela ho duodésimu no espera iha setembru bele funsionaliza Orsamentu Jerál 2018 atu nune’e sustenta mákina Estadu até fin 2018 ho ida ne’e ita haree fali anu fiskál hahú sá fulan nune’e rekopera situasaun orsamentu ne’ebé di’ak atu sustenta iha despeza públika atu setór privadu envolve nune’e prosesu dezenvolvimentu ekonomia bele la’o no sustenta mós setór sira seluk”, katak.

Nia hatutan bainhira oferta ne’e menus tan de’it impase polítika seidauk fó dalan legál atu nune’e osan tama iha konta Estadu atubele ezekuta ida ne’e mak sei problema, entaun funsionáriu barak tebes hein hela maski duodésimu ba saláriu no vensimentu la’o hela, mas seluk hanesan bens no servisu, kapitál menór, kapitál dezenvolvimentu bele mós hetan parte ida husi setór privadu sira para bele kontinua.

Ho balansu entre oferta no prokura osan daudaun ne’e laiha nune’e implika ba atividade emprezariál hahú redús.

“Ha’u fó ezemplu iha semana hirak liubá ha’u observa empreza Aitula Fuel odamatan taka no karreta tanke sira ne’e para, ne’e signifika lahalo ona operasionál ba atividade diária tanba Governu seidauk bele atribui ba iha pagamentu dívida sira ne’ebé durante ne’e karik seidauk halo mezmu intensaun sétimu no oitavu Governu dehan responsabiliza ba dívida sira atu funsiona lalais atividade ekonomia tanba ita-nia setór privadu mak sai setór ida prinsipál atu kontinua ba iha kreximentu ekonómiku”.

Dosente ne’e haktuir ba daudaun presu mina komesa aas husi sentavu 1.01, agora sa’e to’o 1.13, iha fatin balun 1.10.

“Ida ne’e tanba saida mak presu sa’e? Momentu ida situasaun polítika hanesan ne’e, empreza sira foti aportunidade atu halo estratéjia negósiu nune’e hasa’e presu. Ita labele ba impede tanba konsikuénsia husi responsabilidade ba situasaun polítika ne’ebé afeta ba situasaun ekonómika nune’e mós bele afeta ba edukasaun, saúde, agrikultura, indústria”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here