Xefe-Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur

DILI (TATOLI)—Líder nasionál ne’ebé hanesan mós veteranu ida, Lere Anan Timur, husu ba timoroan sira atu labele presiona (halo presaun) ba órgaun soberania, liu-liu Prezidente-Repúblika.

 “Se Prezidente-Repúblika la halo tuir ita nia hakarak, oinsá? Tanba ne’e maka ha’u apela ba timoroan sira lalika presiona órgaun soberania sira. Sira iha sira nia kompeténsia rasik atu uza. Ami nu’udar forsa armada no aperelu Estadu, prontu kumpri Estadu nia desizaun,” Lere hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, relasiona ho kuadru sira hosi partidu polítiku balun ne’ebé horsehik fó deadline durante loron 10 ba Prezidente-Repúblika, Francisco Guterres Lú Olo, atu fó tomada pose ba kandidatu membru Governu na’in sia (9) ne’ebé seidauk hetan tomada pose.

Nia realsa katak halo presaun ba Xefe-Estadu ne’e sala tanba Prezidente-Repúblika Lú Olo ne’e povu maioria maka hili liuhusi eleisaun direta, Lú Olo la’ós nar-naran eskolla án mai okupa kargu Prezidente-Repúblika.

“Timor labele moris iha presaun nia laran. Ha’u dehan katak gerileiru sira uluk halo funu ne’e dehan atu hapara funu tanba lakohi funu. Agora ita halo presaun ne’e ho objetivu saida? Normalmente ita halo presaun ne’e atu halakon buat át ruma, maibé la’ós halo presaun para agrava tan situasaun. Ida ne’e ita labele aseita,” atuál Xefe-Estadu Maior F-FDTL ne’e informa.

Nia husu ba timoroan hotu-hotu tenke toma konsiénsia katak Estadu ida ne’e Estadu ida ne’ebé soberanu.

“Husu ba ita nia komunidade no polítiku sira ho ulun malirin no hamutuk. Liu-liu ita nia líder katuas sira ne’e tenke hamutuk no hamutuk ita bele. Kuandu imi na’in hira ne’e (Lú Olo, Taur, Xanana, Marí no Ramos Horta) hamutuk ne’e, ba ha’u, imi deside buat ruma la tuir lei mós di’ak hela, naran katak ba interese nasionál,” Lere haklaken.

Antes Partidu Kongresu Nasionál Rekonstrusaun Timorense (CNRT-Sigla Portugés), fó warning (atensaun) ba Prezidente Repúblika (PR) iha loron sanulu (10) atu fó pose ba kuadru CNRT nian ne’ebé indijitadu ba membru governu da-8, nu’udar solusaun hakotu impasse politika.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here