Xefe bankada FRETILIN akompaña hosi deputadu seluk halo konferénsia imprensa iha sala bankada, ohin. Foto espesiál

DILI, (TATOLI) – Vise Xefe Bankada partidu Frente Revolusionária Timor-Leste Independente (FRETILIN), Franscisco Miranda Branco, hateten bainhira partidu Kongresu Nasionál Rekonstrusaun Timor (CNRT-sigla portugés) atu halo impeachment (destituisaun) ba Prezidente Repúblika (PR) tenke iha razaun forte.

“Tenke iha razaun forte atu halo impeachment ba Prezidente Repúblika, agora ami lahatene razaun forte ne’e mak ida ne’ebé. Ida ne’e mak ita tenke hatene uluk lai”, tenik iha biban konferénsia imprensa ne’ebé realiza iha sala bankada Parlamentu Nasionál, ohin.

Tuir nia bainhira iha interesse parte ruma, interese Estadu tenke sobrepõe (aas) liu interese grupu.

Branco hatutan lider Nasaun ne’e tenke loke komunikasaun ba malu atu husik ba jerasaun foun. “Importante atu liu husi impase ne’e mak komunikasaun husi parte hotu, tanba interese Estadu no povu mak iha ne’e, la’ós interesse parte no grupu mak sobrepõe (aas) liu fali interese Estadu.

Okaziaun hanesan, deputadu bankada FRETILIN, Antoninho Bianco, hateten impeachment ne’e tuir Estadu direitu demokrátiku kuandu PR iha violasaun grave, maibé kuandu violasaun grave mós tenke keixa ba Tribunál Rekursu (TR).

“TR mak deside katak Prezidente Repúblika halo violasaun grave ba instituisaun ou la’e, hafoin husi ne’eba desizaun ne’e sei liu fali husi Parlamentu Nasionál (PN) no orgaun ne’e tenke hasai desizaun. Ne’e presiza ezijénsia votu ne’ebé mak la’os uituan no la’os fásil”, dehan.

Hatutan, iha konstituisaun la’os partidu mak fó presaun ba PR, maibé partidu halo presaun ba nia PM indijitadu.

“Xefe Estadu iha relasaun instituisaun ho xefe governu no prosesu negosiasaun entre xefe estadu no governu”.

Tuir antigu deputadu ne’e, prosesu nomeasaun ba kandidatu membru governu ne’e entre PR no PM.

“Partidu sira iha AMP tenke liuhosi kanal, CNRT tenke husi kanal Primeiru-Ministru, tanba uluk Primeiru-Ministru indijita husi AMP. Se sira dehan violasaun grave konstituisaun tenke lori ba Tribunál Rekursu mak deside”, dehan tan.

Parte seluk deputadu bankada PD, Mariano Assanami Sabino, hatutan konstituisaun bainhira atu troka PR mak bainhira nia destinu to’o no PN funsiona hanesan interinu hafoin halo eleisaun foun ba PR, seluk  mak se nia inkapasidade.

“Kuandu ita fó votu, pois dada fali mós laiha dalan. Prezidente Repúblika hanesan kandidatu ne’ebé vota direita husi povu ba nia no partidu sira hanesan instrumentu atu bele kandidata no halo kampaña, maibé kuandu vota no dada fali ne’e labele tanba mobiliza povu para vota direita”, katak.

Tuir lideransa PD, dalan di’ak mak diálogu inkondisaun, laiha rezerva no ho laran atu sai husi impase polítika ne’e, maibé atu impeachment PR laiha dalan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here