Sekretáriu Estadu Komunikasaun Sosiál, Merício Juvinal dos Reis Akara.

DILI, (TATOLI) – Sekretáriu Estadu Komunikasaun Sosiál, Merício Juvinal dos Reis Akara, ohin sorumutu ho sosiedade sivíl sira iha edifísiu Forum Organizasaun Naun Govermental Timor-Leste (FONGTIL) Kaikoli, ho objetivu kontinua hametin relasaun nomós komunika programa Governu ba sosiadade sivíl sira nu’udar parseiru.

“Ohin ami komunika programa governu nian liga mós ho orsamentuʺ, tenik nia ba jornalista sira.

Governu sei rona sujestaun no prespestiva kona-ba programa governu no orsamentu hodi hadi’a di’ak liután.

ʺAmi rona sosiadade sivíl sira nia hanoin, liuliu modelu kooperasaun no apoiu maluʺ, katak.

Governu sei hametin liután relasaun ho sosiadade sivíl durante tinan lima. ʺPrimeiru-Ministru apoiu kna’ar komunikasaun sosiál nian para habelar nafatin komunikasaun ho povu, sosiadade sivíl para intende malu, identifika saida maka save importante ba dezenvolvimentuʺ, realsa.

Entretantu, Diretór Ezekutivu FONGTIL, Daniel Santos do Carmo, hateten agredese tanba bele partilla informasaun kona-ba situasaun polítika, liuliu programa governu nian.

ʺSosiadade sivil sira bele fó hanoin atu oinsá dezenvolve liután setór komunikasaun ida di’ak no buras liutánʺ, hateten.

Governu Sei Apoiu Mídia Sira

Biban ne’e, nia reafirma Governu kompromete fó apoiu tékniku no finanseiru ba dezenvolvimentu mídia, tantu privadu no públiku iha Timor-Leste.

Governante hato’o kompromisu ne’e relasiona ho krize finanseira ne’ebé oras ne’e mídia sira enfrenta.

Akara dehan modelu kooperasaun mak direta no indireta. Direta hanesan governu sei mantein sai kliente ba jornál no publisidade sira, enkuantu indireta mak sei kria formasaun barak liután ba jornalista hodi hasae kapasidade no koñesementu iha área jornalizmu.

ʺAmi konsidera mídia hanesan pilar ida importante ba demokrasia hodi sai parseiru atu promove transparénsia, sai fonte informasaun ba governu no  povuʺ, tenik Akara iha edifisiu FONGTIL.

Planu SEKOMS ba tinan lima hodi fó apoiu ba Konsellu Imprensa, Ajénsia TATOLI, RTTL,EP, jornál sira, televizaun privadu, radio komunidade no seluktan.

ʺAmi komunika ona ho asosiasaun jornalista, mídia nain sira hodi hahú ko’alia modelu koperasaun direta no indiretaʺ, katak tan.

Alende ne’e sei harii infrastutura bázika ba mídia públiku sira hanesan RTTL,ep, Konsellu Imprensa, Ajénsia TATOLI no sira seluk.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here