Eis Diretór Nasionál Diseminasaun Informasaun (DNDI) (klaran), Orlando da Conceição reprezenta SEKOMS halo abertura formasaun. Foto TATOLI: Egas Cristovão

DÍLI, (TATOLI)-Diretór Nasionál Diseminasaun Informasaun (DNDI), Orlando da Conceição reprezenta Sekretáriu Estadu Komunikasaun (SEKOMS), akompañadu husi diretór CRC (Sentru Rádiu Komunitáriu-sigla portugés), Luís Evaristo dos Santos Soares halo abertura ba formasaun Metodolojia Peskiza ba funsionáriu sira iha SEKOMS.

Formasaun ne’e fasilita husi asesór nasionál SEKOMS, Constantino da C.C. Escolano Brandão, ne’ebé antes ne’e nu’udar peskizadór, tinan 10 resin, iha Organizasaun Naun Governamentál (ONG), Belun. Formasaun ne’e intensiva.

“Atu halo análize, programa ida di’ak, nia baze mak dadus. Sekretáriu Estadu publikamente, hateten tiha ona katak ita (SEKOMS-red) hakarak fó sai informasaun ho programadu, organizadu no sistemátiku. Tanba ne’e mak atu fó sai informasaun ho didi’ak ita presiza peskiza,” dehan reprezentante SEKOMS, Diretór Orlando da Conceição, iha Palásiu Governu, Ohin.

Reprezentante ne’e reforsa tan katak atu SEKOMS bele hala’o kna’ar ho didi’ak hodi fó sai informasaun hothotu presiza duni halo peskiza hodi hetan dadus informasaun. Buat hothotu nia baze mak dadus. “Pelo menus ita iha koñesimentu báziku atu bele halo peskiza ida ho kualidade,” hateten diretór Orlando da Conceição.

Enkuantu, objetivu husi formasaun ne’e mak hasa’e koñesimentu kona-ba metodolojia peskiza, analiza media no hakerek di’ak relatóriu ba ekipa peskizadór sira no pesoál sira seluk iha Diresaun Peskiza no Análize Media (DPAM) no SEKOMS ba implementa programa sistema komunikasaun sosiál iha Timor-Leste.

Nune’e mós, haklaru papel no responsabilidade ekipa iha DPAM atu halo tuir kna’ar nu’udar peskizadór no analiza media informasaun.

Formasaun ne’e hala’o modulu importante lima hanesan abilidade kritikál no dezeña aproximasaun peskiza, prosesu no sistema halibur dadus iha komunidade, rekoñese no prevene dezafiu sira iha peskiza, prosesu ba analizasaun dadus no hakerek relatóriu.

Entretantu, hafoin abertura, atividade formasaun ne’e hahú kedas, ho introdusaun kona-ba prosesu peskiza.

Katak, iha prosesu peskiza iha pontu importante lima hanesan formula pergunta peskiza, hili metodulojia ne’ebé uza, analiza dadus kualitativa ka kuantitativa, hakerek relatóriu no aplikasaun sira.

Formula pergunta peskiza mak hili tópiku tuir kritéria selesaun, peskiza online: database, jornál no livru, check faktu, sitasaun no referénsia. Uza revista literature atu dezenvolve tópiku nian “scope” no proposta peskiza: títulu, pergunta peskiza, synopsis no objetivu.

Tuir mai, hili metodulojia ne’ebé uza mak kualitativu ka kuantitativu, métodu peskiza: entrevista, peskiza kestionáriu, FGDs (Focus Group Discussions), PRA (Participatory Rural Appraisal). Hetan ema xave no partisipasaun sira-nia atensaun, dezeña métodu peskiza no pergunta entrevista, estratéjia amostra, asuntu etikál no halibur dadus.

Analiza dadus kualitativa ka kuantitativa mak oinsa organiza dadus, identifika tema no kategória sira, buka tendénsia, halimar ho dadus atu buka tendénsia jerál, matriks avaliasaun, koko (prova, intenta) ita-nia esplikasaun uluk no ita-nia esplikasaun alternative, aprezentasaun dadus no hetan konkluzaun.

Relatóriu hakerek nian mak kona-ba estrutura no sekuénsia, dezenvolve argumentu, adapta estilu no lian ba audiénsia oioin, inklui hakerek ho influénsia.

Ikus liu, aplikasaun sira, ne’e kona-ba oinsa halo sumáriu, aprezentasaun nível aas, fila-fali ba komunidade no kompleta komprensaun no komunikasaun sosiál.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here