Prezidente Tribunál Rekursu, Deolindo dos Santos

DILI (TATOLI)—Tribunál Rekursu (TR) iha tempu besik sei fó sai rezultadu levantamentu extraordináriu osan miloens $140 hosi Fundu Petrolíferu ne’ebé antes ne’e Prezidente-Repúblika haruka ba TR atu halo fiskalizasaun preventiva.

“Fiskalizasaun preventiva ba diploma (levantamentu extraordináriu) ne’ebé aprova hosi Parlamentu Nasioná (PN)l agora iha prosesu hela. Prezidente-Repúblika fiksa prazu ne’ebé Konstituisaun maka hateten para Tribunál bele foti desizaun lais iha tempu badak nia laran no oras ne’e Tribunál haree hela atu bele foti desizaun iha semana ida nia laran,” Deolindo hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, hafoin hala’o enkontru regulár ho Prezidente-Repúblika, Francisco Guterrres Lú Olo.

Deolindo informa, nia labele fó ninia opiniaun antesipadamente ba rezultadu fiskalizasaun preventiva tanba nia mós involve iha prosesu foti desizaun.

“Ha’u nu’udar Prezidente Tribunál nomós juiz ida ne’ebé atu foti desizaun ba prosesu ida ne’e, ha’u labele fó ha’u nia opiniaun antesipada ba buat sira ne’ebé maka ha’u rasik sei deside tuir mai,” nia esklarese.

Antes ne’e, 3 Agustu 2018, Parlamentu Nasionál hatán ona pedidu Supremu Tribunál Justisa ne’ebé Tribunál Rekursu maka tutela hodi halo fiskalizasaun abstrata ba konstitusionalidade hosi proposta lei levantamentu extraordináriu orsamentu miloens $140 hosi Fundu Petrolíferu.

Prezidente Parlamentu Nasionál (PPN), Arão Noe, esplika Prezidente Repúblika, la veta proposta dekretu lei hosi Parlamentu Nasionál (PN) maibé, Xefe Estadu uza nia kompeténsia konstitusionál hodi rekere ba Supreme Tribunál Justisa atu halo apresiasaun preventiva ba diploma ne’ebé haruka ba nia atu promulga nia konstitusionalidade.

“Prezidente invoka artigu 149 Konstituisaun RDTL nian iha númeru dahuluk hateten Prezidente bele husu ba tribunál justisa nian atu halo apresiasaun preventiva kona-ba konstitusionalidade ba naran diploma ida ne’ebé nia simu atu halo promulgasaun,” PPN, Arão Noe esplika.

Hodi hatutan “Aktu ida ne’e mak Prezidente halo, maibé la’ós veta. Ha’u klarifika ba públiku tanba komentáriu barak iha mídia sosiál ka mídia profisionál sira hateten prezidente veta dekretu parlamentár númeru 1/V.”

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here