Estrutura TLPU hasai foto hamutuk ho SECOMS, Merício Juvenal Akara, hafoin sesaun deskusaun ramata. Imajen Ajénsia Tatoli/António Gonçalves

DILI, (TATOLI) – Sekraketáriu Estadu Komunikasaun Sosiál (SEKOMS), Merício Juvenal dos Reis Akara, hala’o enkontru ho estrutura Timor-Leste Press Union (TLPU) iha sede TLPU, Bairru Grilhos, segunda ne’e.

Objetivu vizita ne’e nu’udar meius ida oinsá Sekretaria Estadu Komunikasaun Sosiál atu hametin parseria no kolabora ho TLPU nu’udar asosiasaun ba jornalista sira nomós tulun asosiasaun refere iha área kapasitasaun jornalizmu.

“Iha programa Governu Da-Ualu Konstitusionál, ita mós mensiona apoiu ba Asosiasaun Jornalista sira. Tanba ne’e maka ha’u interese loos atu ko’alia ho ita-boot sira kona-ba tipu apoiu ba ita-boot sira. Ha’u presiza deskuti kle’an ho ita-boot sira kona-ba asuntu ida ne’e”, katak Merício.

Governante ne’e hatutan SECOMS mós hanoin ona atu harii Institutu Jornalizmu ho intensaun atu forma jornalista sira tuir área espesialista no kompromete kria kondisaun ba jornalista sira ne’ebé lor-loron halo kobertura iha repartisaun Estadu.

“Ami hanoin atu harii fatin konsentrasaun ida ba jornalista sira, nune’e sira bele konsentra ho dignu. Fatin ne’e sei kompleta ho wifi no nesesidade sira seluk jornalista nian. Pasu dahuluk sei harii iha Palásiu Governu”, tenik.

Entretantu, Prezidente TLPU, Francisco Simões Belo, hateten difikuldade ne’ebé TLPU hasoru maka seidauk iha kbi’it atu transforma sekretariadu asosiasaun refere sai kualidade hanesan instituisaun sira seluk tanba limitasaun finanseira.

Nia mós husu ba Governu liu-liu SEKOMS atu kria kondisaun ba jornalista sira ne’ebé halo kobertura iha instituisaun Estadu, tanba tratamentu ba jornalista sira lahó dignu no tau iha lei atu dignifika.

TLPU harii iha 2008 liu-ba ho sentidu atu halo advokasia ba jornalista sira ne’ebé hetan diskriminasaun hosi kompañia mídia no promove liberdade imprensa. Ohin loron, TLPU iha membru liu ema na’in 200 ne’ebé ho profisaun nu’udar jornalista iha kompañia mídia sira.

Partisipa iha soru-mutu refere maka Prezidente TLPU ho nia estrutura, jornalista sira nomós reprezentante fundadór TLPU.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here