Adriano do Nascimento.

DILI, (TATOLI) – Deputadu Bankada Partidu Demokrátiku (PD), Adriano do Nascimento, kestiona estrada ligasaun husi suku Carabau, sub-distritu Bobonaru, ne’ebé mak kompañia hahú ona atividade enkuantu agora seidauk iha orsamentu.

“Iha estada ne’ebé mak kompañia sira hahú kehe ona husi Carabau, Bobonaru to’o Ainaru. Ne’e hanesan programa boot ida, programa VIII Governu foin aprova no orsamentu seidauk iha maibé projetu la’o dadauk ona, ema fahe malu projetu, balun sukat dadauk no balun kehe dadauk”, intervensaun deputadu iha plenária, ohin.

Adriano hatutan ninia parte antes ne’e hato’o ona informasaun ne’e ba governu no fiar katak ho kompromisu Primeiru-Ministru sei hapara atividade ne’e sein orsamentu.

Hodi konsidera estrada Bobonaru-Ainaru ne’e la’ós emerjénsia, tanba tuir nia atendimentu emerjénsia kuandu iha estrada kotu bainhira udan mai no mota sobu.

“Atu liga Bobonaru-Ainaru ne’e projetu boot ida, ne’ebé ha’u hanoin hakarak rona tanba seidauk hetan karta husi governu atu responde kestaun ne’e. Sera que ida ne’e para ona? ha’u monitór hela no buat ne’e la’o hela. Hafoin VIII Governu mosu (formaliza), projetu ne’e la’o kedan”, tenik

Hatan ba kestaun ne’e, Ministru Reforma Lejislativa no Asuntu Parlamentár, Fidelis Leite Magalhães, hatete parte governu manda ona informasaun ne’e ba ministériu relevante.

“Estrada Bobonaru-Ainaru, ami husi parte governu haruka ona informasaun ba iha Ministériu Obras Públikas no sira hatan laiha konfirmasaun no orientasaun kona-ba kestaun ne’e”, dehan.

Hodi dehan tan, Ministériu Obras Públikas sei kontinua prosesu ne’e no parte governu sei passa informasaun.

“Sirkulár ne’ebé ami fahe ba ita boot sira iha efeitu, favor sujere ba administrasaun lokál para atu rejista no informa, hafoin obras públikas sei halo servisu atu hatene prosesu ne’e di’ak liután. Sira sei kontinua servisu no ami sei passa informasaun”, katak tan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here