Ministru Dionísio Babo Soares enkontru ho Jenerál (Dr.) V.K. Singh husi India. Foto: MNEK

DILI, (TATOLI) – Ministru Negósiu Estranjeiru no Kooperasaun Timor-Leste, Dionísio Babo Soares, hala’o enkontru kortezia ho Ministru Estadu ba Asuntu Negósius Esternu India, Jenerál (Dr.) V.K. Singh no Uniaun-Ministru ba Kooperasaun Internasionál Repúblika Uniaun Myanmar, U Kayw Tin.

Ministru Dionísio Babo akompañadu hosi Diretór Jerál ba Asuntu ASEAN, Embaixadór Jorge Camões, Enkarregadu Negósius Timor-Leste iha Singapura, Konselleru Licínio M. Branco no Diretora ba Asuntu Polítika no Seguransa, Atanasia Pires no ofisiál tékniku, Dircia Pinto.

Iha enkontru ne’e, xefe diplomasia timoroan introdúz nia aan nu’udar Ministru Negósiu Estranjeiru no Kooperasaun (MNEK) foun no aproveita mós hato’o kumprimentus husi lideransa Timor-Leste nian ba nia omólogu hosi India no Myanmar.

Xefe Diplomasia timoroan atualiza situasaun dezenvolvimentu sosiu-polítika no ekonómika iha rai laran. Liuliu kona-ba prosesu demokrátiku ne’ebé la’o iha rai laran, negosiasaun fronteira marítima ho Austrália, inisiativa kona-ba dezenvolvimentu refenaria iha kosta-súl, papél CPLP (Comunidade dos Países da Língua Portuguesa), inisiativa atu introdúz Portugés hanesan língua traballu iha Nasoens Unidas, papél g7+, planu adezaun baCommonwealth no jestaun fundus petroléo. Ministru mós ko’alia kona-ba dezafius ne’ebé Timor-Leste hasoru.

Iha okaziaun ne’e, Ministru indianu promete atu fó apoiu liuhosi tulun ba área identifikada hanesan kapasitasaun iha siénsia teknolojia, defeza, saúde, agrikultura no treinamentu ba diplomata.

Ho parte Myanmar, ministru na’in rua fahe informasaun kona-ba progresu no dezafiu, ne’ebé país rua hasoru no oinsa fahe esperiénsia ba malu bazea ba valores ne’ebé rai no povu rua partilla. Ministru atualiza preparasaun Timor-Leste adere ba ASEAN no lideransa diplomasia Myanmar simu ho di’ak no hein katak Timor-Leste bele sai membru ASEAN iha tempu oin mai.

Iha loron 03 Agostu 2018, tuku 09 dadeer oras Singapura, Ministru no komitiva partisipa iha Southwest Pacific Dialogue (SwPD) Ministerial Meeting, ne’ebé kompostu hosi nasaun Austrália, Indonézia, Nova Zelándia, Papua Nova-Guinea, Filipina no Timor-Leste.

Hafoin remata enkontru Ministeriál Southwest Pacific Dialogue (SwPD), xefe diplomasia timoroan kontinua hala’o enkontru kortezia ho ninian omólogu hosi Nova Zelándia no Japaun. KI

HAKEREK NO HATÁN

Please enter your comment!
Please enter your name here