Primeiru-Ministru, Taur Matan Ruak ho Prezidente Repúblika, Francisco Guterres Lú Olo. Imajen/António Goncalves

DILI, (TATOLI) – Vidal Riak Leman de Jesus nu’udar veteranu husu ba lider sira hanesan Kay Rala Xanana Gusmão atuál Prezidente Aliansa Mudansa ba Progresu (AMP), Taur Matan Ruak atuál Primeiru-Ministru no Francisco Guterres Lú Olo hanesan Prezidente Repúblika tenke iha responsabilidade ba impase polítika, labele halo povu terus nafatin.

“Lideransa sira ne’e uluk veteranu hotu, ita boot sira nia responsabilidade ba perante povu mak saida, povu hein hela ita boot sira. Saida mak ita boot sira atu halo ba povu”, Riak Leman solisita ba lideransa sira iha sede AMP, sábadu ne’e.

Veteranu ne’e haktuir uluk iha funu laran, tempu difisíl maibé hamutuk to’o ukun-án, agora independente ona, saida mak seidauk loos mak sei dada malu, sé mak atu responde povu nia moris.

“Povu sei hein hela ahi, tanba seidauk lakan, bé moos, estrada no seluk tan”, afirma. Tanba ne’e labele dada tan tempu, oras to’o ona atu hamutuk, fó hanoin di’ak ba malu, hatudu ezemplu di’ak ba povu.

Hodi haktuir tan uluk iha funu laran lei laiha, maibé la’o organizadu. Agora ukun-án ona inimigu mós laiha, hein tan saida.

Tanba saida mak to’o agora kandidatu membru governu ladauk hetan posse, sé hirak ne’e mak koruptu ona lori sira ba tribunál no kastigu, labele dada malu tun sa’e, ikus povu mak sofre ba konsekuénsia polítika.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here