Partidu Polítiku sira ne’ebé iha asentu iha Parlamentu Nasionál hanesan CNRT, PLP, KHUNTO no UDT/FM asina akordu polítiku hodi harii Aliansa Maioria Parlamentár (AMP) atu hametin liután maoiria iha uma fukun. Foto mídia CNRT

DILI, (TATOLI) – Xefe Bankada Kongresu Nasionál Rekonstrusaun Timor (CNRT-sigla portugés), Duarte Nunes, hatete Aliansa Mudansa ba Progresu (AMP) ho Frente Mudansa no Uniaun Demokrátika Timor (UDT) asina akordu aliansa maioria parlamentár atu hametin liután forsa polítika iha parlamentu hodi fó apoiu ba governu da-ualu.

“Akordu AMP nian uluk to’o iha formasaun governu ka liu fulan ida, tanba ne’e ohin halo akordu foun AMP nian inklui Frente Mudansa no UDT atu hametin nafatin forsa polítika iha parlamentu hodi fó apoiu nafatin ba governasaun”, esplika Duarte Nunes liuhosi konferénsia imprensa iha sede AMP, Bairru Grilos, sábadu ne’e.

Akordu ne’e bele hamosu aliansa maioria parlamentár. “Ami hamutuk kadeira 36 iha parlamentu hodi fó apoiu tomak ba governu da-ualu atu ezekuta programa to’o tinan lima”, dehan.

Nia realsa kompromisu ne’e la”os atu fahe kadeira maibé atu haforsa AMP, tanba sira nia kompromisu polítiku iha kampaña eleitorál mós hanesan AMP nian.

“Sira mai ho intensaun atu fó apoiu tomak ba AMP atu reforsa hodi hadi’a povu nia moris”, katak.

Nune’e harii aliansa maioria parlamentár ho objetivu atu kria kondisaun ne’ebé nesesáriu atu garante estabilidade polítika durante lejislatura da-lima ho forma asegura kontinuasaun ba kresimentu ekonómiku, kriasaun empregu, erradikasaun kiak no kombate dezigualdade sosiál sira.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here