Prezidente-Repúblika, Francisco Guterres Lú Olo, presta omanájen ikus ba saudoza Aurélia da Costa “Ran Kadalak”. Imajen Ajénsia TATOLI/Xisto Freitas

DILI (TATOLI)—Prezidente-Repúblika, Francisco Guterres Lú Olo, presta omanájen ikus ba saudoza Aurélia da Costa “Ran Kadalak”, inan hosi saudozu José da Costa Amancio “Mau-Hudo Ran Kadalak” iha Bebonuk, Dili, sesta dadér ohin.

Iha nia intervensaun, Xefe-Estadu Lú Olo, hateten saudoza Aurélia oferese oan mane ho naran Mau-Hudo ne’ebé fó isin no ran hodi liberta Timor-Leste hosi okupasaun estranjeira, ne’e duni, nia mai fó omenájen ikus liu ba saudoza Aurélia nune’e saudoza nia klamar bele deskansa ho hakmatek.

Iha biban ne’e, Pedro da Costa “Ran Kadalak”, beioan hosi saudoza hateten, prezensa Prezidente-Repúblika hodi fó omanájen ikus ba saudoza Aurélia, signifika, Estadu rekoñese saudoza nia kontribuisaun ba luta libertasaun nasionál.

“Ami sente lakon tebes bainhira avó husik hela ami, tanba, dezde ami nia pai no maen lakon, avó maka sai hanesan inan-aman ba ami hodi haree ami nia eskola no nesesidade uma laran ninian,” Pedro haktuir.

Saudoza Aurélia moris iha Aldeia Baçara-Uai, Suku Hae-Coni, Postu Administrativu Baguia, Munisípiu Baucau, kaben ho Pedro da Costa hosi knua Manu-Tasi Asa’e, Munisípiu Ainaro, iha oan ida mesak José da Costa “Mau-Hudo” no hakiak mós oan ida ho naran Júlio da Costa (Besitau-Rubi).

Saudoza sai militante ba partidu ASDT iha tinan 1975 nomós militante ba FRETILIN hafoin ASDT transforma án ba FRETILIN iha 11 Setembru 1975.

Bainhira golpe mosu iha Timor (1975), saudoza ho nia família tomak hetan persegisaun maka’as hosi UDT sira tanba ninia oan Mau-Hudo nu’udar prezidente ba organizasaun OPJT (Organizasaun Populár Juventude Timor).

Iha 20 Agustu 1975 bainhira FRETILIN kontra golpe, saudoza tún ba Dili hodi kontinua suporta partidu FRETILIN atu luta ba ukun rasik án.

Saudoza asumi kargu nu’udar responsivel OPMT (Organização Popular Mulher de Timor) iha Zona Lafaek 1912 Baguia hodi fó apoiu ba organizasaun feto (OPMT).

Bainhira forsa Indonézia invade Timor iha 7 Dezembru 1975, saudoza nafatin responsável OPMT ba Zona Lafaek 1912 Baguia hodi fó orientasaun ba feto maluk sira to’o baze apoiu rahun.

Iha 1 Janeiru 1979, militár Indonézia Bataliaun PASMAR 7 kaptura saudoza iha foho Matebian hodi lori ba detein preventiva iha KORAMIL Baguia, iha ne’ebé saudoza infrenta agresaun fízika grave hosi militár sira to’o tinan 1980.

Iha tinan 1981, militár Indonézia desterra saudoza ba Postu Venilale to’o tinan 1982 no iha prinsípiu tinan 1981, saudoza hola parte sai ativista ba Kaixa Klandestina MASIN MIDAR iha Venilale to’o tinan 1999 no iha tempu ne’ebá mos hetan torturasaun hosi militár Indonézia tanba oan mane Mau-Hudo nu’udar FALINTIL iha ailaran.

Iha 31 Jullu 2018 tuku 23:45, saudoza hakotu iis iha Ospitál Nasionál Guido Valadares (HNGV-sigla portugés), Dili, tanba infrenta moras infesaun pulmaun.

Tanba saudoza nia partisipasaun ba luta ukun rasik án durante tinan 23 fulan 10 no Dedikasaun Eskluziva tinan 16, Estadu liuhusi Prezidénsia-Repúblika autoriza haloot saudoza iha Jardin Eroi Metinaro, sesta ne’e, tuku 16:00 Otl.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here