Foto/MF.

DILI, (TATOLI) – Ministériu Finansas (MF) fó sai ona progresu ezekusaun Dotasaun Orsamentál Temporária (DOT) juñu 2018 ne’ebé atinje porsentu 63 husi totál orsamentu hamutuk $105,754,444 ne’ebé esklui empréstimu.

Tuir informasaun husi sistema Portál Transparénsia ne’ebé TATOLI asesu ohin katak kompozisaun ezekusaun DOT Juñu 2018 mak saláriu no vensimentu porsentu 85, bens no servisu porsentu 48, kapital dezenvolvimentu porsentu 76, transferénsia públika porsentu 60 no despeza kontijénsia porsentu 0.3.

Aleinde ne’e iha alokasaun DOT jullu 2018 hamutuk $88,769,422 ka porsentu 84 husi tetu DOT ne’ebé esklui empréstimu, ne’e signifika poupa deit $17,307,635 ka pursentu 16 husi tetu DOT.

“Bainhira kompara ho períodu janeiru hetan poupansa hahú ho porsentu 13, fevereiru tun ba porsentu 3, marsu tun ba pursentu 1, abríl tun ba 0.6 no maiu sa’e ba 8.6, juñu tun ba 0.3 p no jullu sa’e fali ba porsentu 16. Ne’e signifika, mezmu halo ona esforsu suspende atividade, maibé nesesidade atuál presiza hetan apoiu másimu hodi responde no evita tusan iha futuru, maibé sei respeita nafatin tetu ne’ebé determina ona”, haktuir iha portál.

Ho esforsu lubuk ida liuhusi suspende atividade hanesan iha períodu janeiru no maiu hodi fó atensaun fali atividade seluk ne’ebé presiza tebes solusiona, maibé sei reprezenta nafatin montante boot, tanba atividade esepsionál tuir artigu 6 husi Dekretu Ezekusaun DOT presiza kontinua prevé despeza hanesan akividade eleisaun ne’ebé através prosesu aprovizionamentu ba pagamentu finál, servisu legál, fundu rezerva kontijénsia hodi responde pedidu ne’ebé hetan ona autorizasaun husi Primeiru-Ministru, inklui aumentu ba RAEOA no apoiu Konferénsia Episkopál.

Diretór Jerál Finansas Estadu MF, Januário da Gama, hatete iha ditribuisaun DOT jullu nian foin lalais ne’e dehan progresu ezekusaun DOT husi janeiru to’o juñu nia taxa ezekusaun iha nivel média to’o de’it iha porsentu 64.

“Tanba ita-nia ezekusaun ida ne’e sempre iha kaduka iha fim do mês entaun nia prosesu ne’e mak ita lori bá fulan tuirmai no tanba ho limitasaun períodu ba ezekusaun nian iha períodu orsamentu duodesimál nian hamosu duni taxa ezekusaun ne’ebé ki’ik, maibé nafatin korresponde ho nesesidade ministériu no instituisaun sira hotu”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here