I Vise Sekretaria Parlamentu Nasional, Angelina Sarmento. Imajen/Egas Cristovão

DILI (TATOLI) –Parlamentu Nasionál (PN) ohin (03/08) hatán ona kona ba pedidu Supremu Tribunál ba Justisa hodi halo fiskalizasaun abstrata ba konstitusionalidade hosi proposta lei levantamentu estraordináriu osan U$ 140 millions hosi fundu petrolíferu.

Vise Prezidente Parlamentu Nasionál (VPPN), Maria Angelina Sarmento esplika, ohin kompleta loron haat  fó ona hanoin ba Tribunál Rekursu (TR) tanba loron ohin termina ona loron haat ba PN atu hatan kona-ba pedidu refere.

Relativamente ho pedidu Tribunál Rekursu nian mai Parlamentu Nasionál atu fornese informasaun ba tribunál ho tan pedidu ne’ebé haruka hosi Prezidente Repúblika kona-ba proposta lei ba levantamentu estraordináriu U$140 millions. Ida ne’e Prezidente Parlamentu prepara ona resposta ka informasaun ne’ebé mak tribunal presiza atu ajuda hodi hatene didi’ak katak tribunál bele halo nia fiskalizasaun abstrata ba konstitusionalidade hosi proposta lei levantamentu estraordináriu, enkuantu PN hatán ona pedidu hosi tribunál,” VPPN, Maria Angelina Sarmento informa Ajénsia Tatoli iha PN, Ohin.

Nia dehan, tuir Konstituisaun Repúblika Demokrátika Timor-Leste (RDTL), Artigu 149 ko’alia kona-ba fiskalizasaun preventiva ba konstitusionalidade katak iha alínea dahuluk, mensiona Prezidente Repúblika bele rekere ba Supremu Tribunál ba Justisa atu halo apresiasaun preventiva ba diploma ne’ebé haruka ba nia atu promulga nia konstitusionalidade.

Hafoin PR husu TR atu halo fiskalizasaun preventive, órgaun judisiáriu notifika mai PN hanesan autór ba aprovasaun ba dekretu lei, no tuir lei tribunál fó ba PN ho loron haat atu fó resposta, nune’e mós ba tribunál ho prazu loron 10 nia laran.

Informasaun PN nian iha ona Tribunál, nune’e Prezidente Tribunal Rekursu sei halo akordeaun ida atu responde ba pedidu Prezidente Repúblika, Lú-Olo nian.

Hosi parte bankada governu nian, iha parlamentu prontu ona atu fornese informasaun hirak ne’ebé nesesáriu ba Tribunál hodi halo análize pedidu hosi PR nian.

Maski nune’e pozisaun PN nian mantein nafatin tanba pedidu governu nian nesesita duni Estadu liuhosi osan ho valór U$ 140 millions hodi responde ba fulan rua nian.

Se tribunál deklara liuhosi akordeaun dehan aktu ida ne’e inkonstitusionál, ita hotu tenke hakaruk tanba desizaun TR mak desizaun aas liu.

“Fiar katak órgaun Estadu sira tau ses tiha interese polítika partidária atu bele responde ba nesesidade urjente sira iha ita nia nasaun,” Angelina  fó hanoin.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here