SEKOMS, Merício Akara hasai foto hamutuk ho komunidade musulmana. Foto TATOLI: Egas Cristovão

DÍLI, (TATOLI)-Komunidade musulmana Timor-Leste (TL) hakarak mantein komunikasaun ne’ebé efetiva ho governu no entidade relevante hodi kontribui ba dezenvolvimentu país ida ne’e nian.

“Ba futuru, ha’u hanoin ne’e pasu ida ne’e mak importante, la’ós primeiravez, depois ida ne’e hotu ita la iha komunikasaun ona maibé tenke mantein komunikasaun nafatin oinsa ita bele kolabora malu; papel igreja oinsa atu eduka ema oinsa sai ema di’ak, sosiedade ida di’ak, hodi dezenvolve nasaun ida ne’e,” dehan Xefe Fundasaun Meskita Annur, Díli, Muhamad Anwar da Costa ba jornalista sira, kinta ne’e.

Xefe Fundasaun, Muhamad Anwar da Costa hodi komunidade islámika TL agradese tebes Sekretáriu Estadu Komunikasaun Sosiál, Merício Juvinal dos Reis “Akara” tanba bele vizita sira iha Meskita Annur, hodi bele informa mós kona-ba dezenvolvimentu la’o ba oin, iha governu ida ne’e. “Ami agradese tebes,” nia espresa.

“Liuliu kona-ba komunikasaun entre governu ho sosiedade sívil, instituisaun relijioza nian, hanesan parseriu ba governu oinsá bele serbisu hamutuk, saida mak ami bele kolabora para governu ida ne’e la’o di’ak i dezenvolvimentu nasionál ne’e bele la’o ba oin,” hateten Xefe Fundasaun Meskita Annur, Díli, Muhamad Anwar da Costa.

Enkuantu, SEKOMS durante sorumutu ho komunidade relijioza ne’e, hato’o informasaun barak relevante planu, prioridade no programa ne’ebé governu ida ne’e sei hala’o durante nia mandatu.

Nune’e mós rona aspirasaun no hanoin sira husi komunidade musulmana inklui hato’o servisu no papel media sira iha iha kontextu promove demokrasia no dezenvolvimentu nasionál Timor-Leste.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here