DILI (TATOLI)—Ekipa Core Group Transparancy Timor-Leste (CGT-TL), sesta ne’e iha Palásiu Prezidente Nicolau Lobato, Bairru Pité, hasoru malu ho Prezidente-Repúblika (PR), Francisco Guterres Lú Olo, hodi hato’o sira-nia apresiasaun ba pozisaun PR hodi hametin boa governasaun.
Rede organizasaun sosiedade sivíl ne’ebé tau-matan ba kestaun transparánsia ne’e hato’o mós kona-ba harii relasaun entre organizasaun sosiedade sivíl ho Prezidente-Repúblika ba asuntu transparánsia no boa governasaun.
Reprezentante Core Group Transparancy, Juvinal Diaz informa mós atu Xefe-Estadu kontinua iha komunikasaun di’ak ho líder polítiku sira seluk no rekomenda atu iha futuru ema ida atu ba ukun tenke liuhusi dalan ‘fit and proper test’ nune’e ukun-na’in sira bele tulun povu Timor-Leste sai hosi ki’ak ba moris di’ak.
Enkuantu, Prezidente-Repúblika apresia esforsu serbisu organizasaun sosiedade sivíl ba transparánsia nian no iha kompromisu atu serbisu hamutuk ba dezenvolvimentu Timor-Leste ida ne’ebé di’ak liu.
Jornalista: Xisto Freitas
Editór : Manuel Pinto
