Vise Governadór Banku Sentrál Timor-Leste (BSTL), Venancio Alves Maria no Koordenadór Unidade Administrasaun Fundu Petrolíferu Ministériu Finansas, Filipe Nery Bernardo. Foto/BSTL.

DILI, (TATOLI)- Vise Governadór Banku Sentrál Timor-Leste (BSTL), Venancio Alves Maria, hatete BSTL foin halo transferénsia osan husi Fundu Petrolíferu ( FP) ba orsamentu Estadu millaun 70 iha  de’it maiu 2018.

“Juñu ita seidauk halo transferénsia”, Venacio afirma ohin iha edifísiu BSTL bainhira halo lansamentu ba relatóriu trimestrál Fundu Mina-Rai nian.

Venancio dehan husi perspetiva BSTL nian bainhira simu instrusaun iha sorin seluk Governu nian no iha Parlamentu loos ona no ezekutivu haruka orientasaun mai BSTL maka nia obrigasaun mak transfere tuir instrusaun ne’ebé simu husi Ministériu Finansas.

“Ida ne’e mak prosesu durante ne’e ita hala’o. Banku Sentrál nia kompeténsia mak haree instrusaun mai ona, ami observa tuir prosedimentu ne’ebé estabelese iha akordu jestaun entre Banku Sentrál ho Ministériu Finansas ami transfere”, katak.

Koordenadór Unidade Administrasaun Fundu Petrolíferu Ministériu Finansas, Filipe Nery Bernardo, dehan kona-ba transferénsia husi kapitál Mina-Rai ne’e iha lei FP klaru katak haruka só ba de’it iha orsamentu Governu nian.

“Orsamentu ita ko’alia ne’e iha buat rua, ida mak prosesu orsamentu normál kada tinan Governu tenke lori proposta ba Parlamentu debate, aprova hira mak atu hasai ida ne’e mak sira hasai husi ne’ebá, mas husi situasaun seluk mak agora ita iha laran agora ne’e Dotasaun Temporáriu, ne’e duni husi ne’ebá lei mós fó dalan katak Governu bele uza orsamentu tetu atubele finansia teporáriamente nia despeza to’o nia iha orsamentu foun”.

Hatutan bainhira haree ba Governu anteriór nian deside hodi informa Parlamentu oinsá bele hasai osan husi FP.

“Sira informa mas momentu ne’ebá laiha debate. Hanesan foin daudaun ne’e iha prosesu ida Governu informa Parlamentu ho ko’alia atu hetan aprovasaun atu dada sai osan, mas iha prosesu osan sai husi fundu ne’e tenke mai iha prosesu orsamentál hotu tiha mak ba Parlamentu atu informa ou aprovasaun”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here