DILI, (TATOLI) – Embaixadór foinsa’e timoroan ba mudansa klimátika, Justaquiu Fabiano Lasi (Jake), sei fahe esperiénsia kona-ba sensibilizasaun globál mudansa klimátika no polusaun oseanu iha Timor-Leste (TL) ba juventude sira iha Knua Juventude Fila Liman, Pateo, aban sesta, tuku 10.00 liuhusi “Insprirational Talkshow”.

Jake, ho idade 26, nu’udar reprezentante iha Rejiaun Sudeste Aziátiku maka selesionadu hodi partisipa iha programa Ró Pás no Embaixadór Foinsa’e ba Klimátika nian, hamutuk ho lideres foinsa’e sira seluk mai husi nasaun Oseanu Pasífiku, Oseanu Índiku no Karibea mos partisipa iha viajen loron 17 durante juñu no jullu ne’ebé destaka importánsia halo konservasaun ba tasi ka oseanu no haree ligasaun importante entre klima no tasi.

Nia viajen ida ne’e liu ona fatin balun hanesan Portu Dinamarca, Noruega, Islándia no Kanadá no fahe ninia esperiéensia kona-ba alterasaun klimátika no degradasaun marinu molok to’o ba iha Nova Iorke iha loron 12 Jullu hodi partisipa iha Forum Alto Nível ba Dezenvolvementu Sustentável ne’ebé embaixador foinsa’e sira relata sira-nia esforsu ba komunidade Nasoens Unidas no públiku.

“Ida ne’e nu’udar oportunidade bo’ot ida hodi bele destaka Objetivu Dezenvolvimentu Sustentável (ODS), ne’ebé ninia alvo maka suporta komunidade hodi adapta ba iha risku sira relasiona ho klima no proteje eko-sistemas marinu no kosteiru”, hatete Jake, estudante Bacharelatu Ciências da Terra, iha Universidade Nacional de Timor-Leste (UNTL).

“Nasaun Unida no Programa Nasoen Unida ba Dezenvolvimento (PNUD) haksolok hodi fo kontribuisaun ba Jake ninia viajen nomós apoiu Jake hodi fahe ninia esperiénsia hamutuk ho foinsa’e sira seluk iha Timor-Leste”, dehan PNUD, liuhusi komunikadu refere mai redasaun TATOLI, ohin.

Entretantu, atividade ne’e realiza tanba hetan patrosíniu husi governu Timor-Leste, Sekretáriu Estadu Juventude no Desportu (SEJD), IADE (Instituto de Apoio ao Desenvolvimento Empresarial), SERVE (Serviço de Registo e Verificação Empresarial), BNCTL (Banco Nacional do Comércio de Timor-Leste) no Telemor.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here