DILI, (TATOLI) – Fundu Hosi Nasaun Unida Ba Labarik (UNICEF-sigla inglés) apoiu osan ho valór rihun $69,732 ba rádiu komunidade sira iha Timor-Leste (TL), liuhusi parseria ho Sekretariu Estadu Komunikasaun Sosiál (SEKOMS).

“Planu konkretu mak apoia ona orsamentu 2018 até 2019. Entaun sira fó hanoin, karik sei iha kontinuasaun liga ho rádiu komunidade sira. Dadaun sira apoiu ita-nia rádiu komunidade ho totál 69, 732 dolár ba tinan ida”, katak Sekretáriu Estadu Merício Juvinal dos Reis “Akara”, ba jornalista sira iha nia kna’ar fatin Palásiu Governu, ohin.

Alende finanseiru, UNICEF mós apoiu ekipamentu nomós kestaun espesiál balun liga ho kestaun labarik sira mak oinsá halo protesaun no étika.

Merício Akara haktuir UNICEF parseria ho SEKOMS kle’ur ona no apoia mós Rádiu Televizaun Timor-Leste.

Tanba ne’e, iha sorumotu ohin, UNICEF reprezenta husi nia reprezentante, Valerie Taton, hasoru SEKOMS hodi atualiza informasaun sira kona-ba saida mak UNICEF hala’o ona durante ne’e.

Governante ne’e mós haktuir tempu hanesan, UNICEF ho SEKOMS ko’alia kona-ba planu ba oin, nune’e sira iha komprensaun hanesan katak presiza dezenvolve asuntu liga ho polítika direitu labarik sira, halo notísia sobre labarik sira.

Nune’e mós, oinsá haree aspetu legál balun ne’ebé mak bele halo hamutuk hanesan halo kódigu konduta iha parte rádiu komunidade liga ho étika halo reportajen kona-ba direitu labarik sira nomós notísia nasionál ne’ebé sempre hanoin mós kona-ba étika halo reportajen liliu ba labarik sira.

Sekretáriu Estadu relata mós katak SEKOMS prontu kolabora iha nível polítika no operasionál, karik iha formasaun ruma; tau ba konteúdu informasaun liga ho direitu labarik, kuríkulu ba formasaun presiza tau atensaun.

Feto ho labarik sira presiza tau atensaun iha kondisaun diferente. “Ami ko’alia ida ne’e. Parte rua; SEKOMS ho UNICEF iha hanoin hanesan atu kontinua kooperasaun ida ne’e i sei iha enkontru regulár atu update (atualiza) informasaun no sei vizita rádiu komunidade balun iha munisípiu atu haree hamutuk”, katak tan.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here