Enkontru Konsellu Ministru, ohin. Foto António Goncalves

DILI (TATOLI) – Governu liuhosi reuniaun Konsellu Ministru (KM), aprova rezolusaun governu konaba donativu, ho montante US$ 750.000 hodi apoiu Repúblika Indonézia ho Laos.

Sentimentu solidariedade ne’e mosu tanba akontese dezastre rai nakdoko iha Lombok (Indonézia) no asidente barrajen iha parte Attapeu (Laos).

Ministru Estadu Prezidénsia Konsellu Ministru, Agio Pereira esplika rezolusaun ne’ebé konsellu ministru aprova hanesan apoiu finanseiru ho karater umanitáriu

“Konsellu Ministru aprova rezolusaun rua, ida atu fó apoiu finanseiru ho karakter umanitáriu ba rai nakdoko iha Lombok, Repúblika Indonézia ho vítimas barak no aprova mós rezolusaun apoiu finanseira nu’udar membru ONU, atu responde ba apoiu internasionál ne’ebé governu Laos halo ba komunidade internasionál,” Agio Pereira esplika ba jornalista sira, iha Palásiu Governu, ohin.

“Ministériu Finansas mak sei operasionaliza rezolusaun ida ne’e, hanesan ita nia devér. Laos ne’e rai ASEAN no apoiu makas Timor-Leste atu tama ASEAN no rai belun boot ita nian”, nia dehan tan.

Enkuantu Lombok parte ida Repúblika Indonézia, ne’ebé hanesan país viziñu no hanesan belun boot tanba ne’e hanesan devér estadu nian, atu fó kontribuisaun ba nasaun rua ne’e hotu hamutuk US$ 750.000, hanesan apoiu ida ne’ebé la’ós mak atu rezolve problema, maibé kontribui ba solusaun, iha nasaun rua ne’ebé hetan dezastre.

Entretantu iha loron 27 Jullu madrugada, rai nakdoko ho magnitude 6,4 eskala richer, tuir dadus husi autoridade ema na’in 17 mak mate, 401 mak kanek, no ema na’in 10.062 ne’ebé mak hela besik fatin akontesimentu besik Foho Rinjani, evakua ba fatin evakuasaun provizóriu.

Alende ne’e dezastre Naturais ne’e rezulta, uma hamutuk 5.448 mak at, 15 fasilidade edukasaun, 5 fasilidade saúde mak at no fasilidade públiku seluk tan.

Enkuantu iha loron 23 Jullu, barrajen bee Xe-Namnoy nakfera iha provínsia Attapeu, Repúblika Laos, hodi rezulta aldeia hamutuk 13 no ema hamutuk 6.000 resin mak kona impaktu husi dezastre ne’e. Alende ne’e, ema na’in 17 mate no 131 sei lakon.

Nu’udar informasaun ba públiku katak, Repúblika Indonézia no Laos hanesan nasaun membru ASEAN, ne’ebé apoiu makas Timor-Leste atu adere ba asosiasaun nasaun sudeste aziátiku ne’e. Nasaun Ázia rua ne’e mós nu’udar membru Organizasaun Nasoens Unidas (ONU), ne’ebé Timor-Leste mós hola parte ba.

Iha parte seluk Ministru Agio Pereira mós informa katak, KM mós hare aprezentasaun Ministériu Defeza konaba programa treinamentu ba pilotu militár, ne’ebé hanesan programa ida entre forsas Filipina no forsas F-FDTL.

“Hare akordu ne’e atu fó kontinuidade ou lae, hanesan aprezentasaun de’it, maibé la hetan aprovasaun. Aprovasaun iha Konsellu Ministru tuir mai mak foin hare no finaliza,” nia hakotu lia.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here